Korea ah rianṭuan in a ummi Falam peng, Valung khua i a ummi le Falam Christian Fellowship Korea (FCFK) chungtel a simi Salai Kim Tham Mawi kum (21) nih ruah lo piin tuni Hniang 31|08|2020, zinglei suimilam 11:30 AM tluk ah mual a kan liam tak tiah kan theih.

Salai Kim Tham Mawi hi Chuncheon, Gangwangdo, Korea ah E-9 Visa in kum 3 chung rianṭuan liomi a si. Hniang 29|08|2020 zaanlei suimilam 3:30 PM tluk ah a hawile rianṭuan an lawi hnuah an rianṭuannak Chuncheo Myo pawng ah ummi tiva ah nuamhnak ah an kal hna. Salai Kim Tham Mawi hi a hramthawk ah a fenh hmasat i ahawipa Nung Piang nih a va zuan hnawh i amah lila zong a fenh chih.

Cuticun Salai Kim Tham Mawi le Nung Piang cu ti a fenh hna tikah Nung Piang lawng hi an hawile kawl pa 2 nih vanṭhat an chanhchuah khawh. Salai Kim Tham Mawi tu cu Palek pawl an phak hnu lawngah an chanhchuah khawh.

A rianrannak in an pahnih ningin sizungah tlikpi colh an si. Nung Piang tu cu dam lei a panh ziahmah cang. Asinain a hawipa Kim Tham Mawi tu cu a dirhmun chiat lei a panh chin lengmang. Sizung ah nihnih chung zohkhenh a si hnuah, Hniang 31|08|2020, zinglei suimilam 11:30 AM ah a nunnak a liam hi a si.

Kawlram i a kal takmi a chungkhar a nulepa, unau rual a tuarzia an thiam khawhnak hnga le a ruak zong tlamtlingte in an vuai khawhnak hnga thlacamnak in bawm cio hna usih. Tantakmi chungkhar Bawipa nih hnem hram ko hna seh. Chirhchan: Falam Christian Fellowship Korea