Breaking News: Motorcycle Pahnak in Hakha ah Minung Pakhat a Nunnak Liam. Hakha khuathar, Thantlang lampial phanh hlan ah Motorcycle i pah sualnak a chuak i pa pakhat a nunnak a liam tiah thawng kan theih.

Nov. 10, zinglei suimilam 11:30 hrawng ah Pu Van Uk Lian, kum 44 le a hawi pa an i citmi Motorcycle cu mer/kuih an timh lio ah lamthluan in a rami Motorcycle pakhat nih a pah sual hna hi a si.

Motorcycle pahnak in Pu Van Uk Lian cu Hakha siizung an phakpi hnu ah a nunnak a liam. Pu Van Uk Lian hi Hakha peng Farrawn khuami a si, fa 4 a ngei cangmi a si. Pu Van Uk Lian ruak cu siizung mithi khan ah an chiah chung tiah thawng kan theih. Thil sining kong he pehtlai in palik nih hlathlainak an tuah cuahmah lio a si. Source: The Chin Journal

Thawngpang dang rak rel chih: BIDEN NIH A TEI THAI LAI MAW?: US President thimnak vote an rel thlu deng cang. Atu tiang ah cun Biden nih toden 290 a hmuh tiah media pawl nih an thanh chung. Official nih thanhmi cu a si rih lo. Georgia, N. Carolina, le Alaska i ai teimi hi an phuang duh rih lo. Airizona zong Biden nih a tei tiah an ruah cang nain Trump vote hmuh mi zat a karh deuh ve i Biden nih 15432 lawng in a thlau cang. Vote rel ding 77000 hrawng a um rih an ti. Cucaah AZ ah hin aho nih dah a tei thai te lai ti chim khawh cu a si tuk rih lo.

Atu ning in cun Trump nih George, N. Carolina, Alaska, le Arizona ah tei dih ko hmanhsehlaw toden 259 a hmuh lai i 270 a tling hlei lo. Cucaah an i tluk ngai nak state dang Wisconsin le Pennsylvania ah a tei hrimhrim rih a hau. WI le PA ah hin Biden nih 98% an rel cangmi ah vote 20540 le 45475 in a thlau rih. Trump nih a tei kho ṭhan hnga maw ti hi ruah awk ngai cu a si.

President Trump caah ruahchannak pakhat a um ve rihmi cu court i legal challenge (lawsuits) an tuahmi hi a si. Cabawm in vote thlakmi (Mail in ballots) an tawlrel ning le phungning lo i vote thlakmi le vote rel ning kong tbt. ah thil dik lo (fraud le irregularities) a ummi an hmuh/theih khawh i court i an chuahpi khawh ahcun thil sining ai thleng ṭhan khomi cu a si ko. Nain cuhlan i rak ton cangmi thil sining zohchih tikah court biakhiahnak in 2020 US Election result hi a dih ding cu zumh a um tuk lo. Lungsau in hngah rih tu cu a hau ko lai.

Zarhthum chung ah President Trump le a team nih VERY SOLID EVIDENCE an hmuh khawhmi court ah an chuahpi khawh a hau lai. Zumh awktlak taktak thil diklo tuahmi an hmuh khawh lo i Court nih a ceihpiak duh hna lo (denied) ahcun President Trump nih thachia ngai in ka sung ko ti a cohlan i CONGRATULATIONS President Elected Joe Biden tiah a phuan hau te ko lai.

State cio nih vote an relmi result hi a hnubik December 8 hlan ah an fehter a hau lai i December 14 ah electors pawl nih vote an pek cio lai i President hi an thim lai. Electors pawl nih vote an pekmi hi Congress nih an cohlan (approved an tuah) hnu ah President thimmi hi January 20 ah biakamnak (Oath) tuahter a si te lai. Ref: The Chin Voice