Tuzing cu ngeihchiatnak thawngpang nih a ka zelh hoi. Ka hawikom tha ka U Cung Kam (Halkha Khuathar) nih a kan liamtak ti thawng asi. Mino Choir hlaremh ah a feltaktakmi, tette khan a feltakmi le Khrihfabu rian poh ah hmai a suang tawntu asi.

A luancia nihnih (May 18) zanlei muih hnu ah phone a ka chawnh i bawmh ka herh, thaizing ka vun in leng lai a ka ti. Cu lio ahcun a dam ngaingai ko. Athaizing chunnitlak a ralo, aa manh thanlo caah asi lai tiin ka hei chawn than lem tilo. Zalei ah kan Pastor Rev. Bawi Cin nih; kik nih a tlaih i a damlo caah zantim i sizung ah an kalpinak kong a kan thanh i, a dam zau ko lai tiin hnangam in ka hei um ko. Phone a rak ka chawnh zan kha sizung a rak kai cu asi.

Ruahlo tukin atuzing zinglei 4 AM ah a kan liamtak timi thawng ka theih cu ka lung a kuai hringhran, lau zong kalau, zei tuah awk ka hngallo. Cu lak ah a poi khun hoimi cu atulio hi ruak huam le ruak thlah ah mitampi itel a ngahlo lio asi. Halkha khuathar ah hringtu anu a nung rih; taamtakmi chungkhar Bawipa nih hnemh hram ko hna seh.

U Cung;
Mino na hawile cu na zuun in caan saupi kan rak tuar lai. Pulrai a dih i Biakinn on than tik ah mino na hawile sinin na bau ruangmang lai mu. Na ruak cung te hmanh ah mitthli thlaknak le, na ruak cungah thlahnak hlaremh hmanh kan sak khawh lailo ruah ko ah lung fah le ngeihchiat a zual. Bawipa taangnem ah daite in vai din chung ai kun mu. Credit: Ram Tinthei