Chin ramkulh Tedim khuapi, Myo-tit sang, Thlacamnak hmun pawngah Chinpa Palik ṭuan liomi Thang Khan Kim kum 23 cu nam in sawh hlimhma he February 2 zinglei ah a ruak in an char tiah theih a si. Zinglei suimilam 5 hrawngah aruak hi hmuh a si i nam in sawhnak hmun 3 hrawng a tak pum ah hmuh a si. Aruang pawngah ca a ṭial taakmi, Phone le nam an hmuh i a konglam cu Tedim khuapi i palik pawl nih an hlathlai lai tiah theih a si.

Tedim khuapi i a ummi Kim Tuang nih cun a chimmi cu “Ni 5 ni ah Rihkhawdar ah a kal i Mansawng Lilawn ah rianṭuanmi a si. A rianṭuannak in a rak kir i inn ah nikhat chung a it. Zaan suimilam 10 hrawngah leng a chuak. Zinglei suimilam 5 hrawngah Tedim khua thlacamnak hmun pawngah thlacammi nupawl nih a ruak an hmuh hi a si” tiah a chim.

 

Kim Tuang nih a chim chap rihmi cu ” Tedim khuapi ah rithai sii a tawng thammi an karh chinchin i a donghnak ah mifir le suamhmang dirhmun ah an i chuah hna. Pumh caan zongah chungkhar dihlak in i pumh lo dingin le inn ah mi pakhatkhat inn hngak dingin Palik lei nih ralrinnak an pek cang hna” tiah a chim chap.

Kum 2019 ah sii tawngmi an tam tuk ruangah Tedim khuapi ah a ummi Cikkha khuapi hna ah cun kumkhat chungah sii tawngh ruangah a thimmi hi mi 10 hrawng an si cang tiah theih a si. Atu Mino rithai-sii tawngmi an tam ngaingai. A poi tuk hringhran mino nunnak latu pakhat a si. CW