Naicikua social media ah a laar cemmi cu Pu ZB nih Pu ST le Pi NSL cu a rem hna locaah MLA i cuh kholo dingin hnawn a timh hna tiah hmuh le rel cio cu asi. Zapi nih kan ruahning ahcun Pu ST le Pi NSL cu an thleng bak hna lai tiah zumh le chimrel cio asi ko. Asinain NLD headquaters nih candidates min an thanh taktak tik ahcun zapi cu kan lau ko. Kan ruahning he cun aa linglet. Pu ST le Pi NSL cu an kelte ah an hmun i, Pu Bawi tu cu MLA in MP ah an thleng deih ko.

Pi NSL an report anti lio ah hin kei cu an report kholai lo tiah ka zumh cia cang. Pi NSL hi mifel asi i, hlutdaw ah kum 5 khelte a tlawngleng ve cangmi asi. Cun Kawl Media nih Interview an tuah tik zongah NLD cozah zong an tlinlonak cu raltha tein a chim ngammi MP tha bak asi. Party MP siloin Mipi kan MP dirhmun ah a colcang mi asi.

Cun NLD party lutlai pawl he zong pumpak in an i theihngal hna lai ticu a fiang ko. An report nak pawl tham cu ol tein aa phisin khawh lai i, MLA in cun an thleng lai lo tiah ka rak zumh cia pah rengreng. Pu ST ca zongah an luban sinah a chimhpiak khawh chih lai tiah ka zumh beh. Pi NSL kong he pehtlai in online ah a phunphun in ruahnak pek cio cu asi. Tam deuh nih an zumhmi cu an Luban nih CM ca ah an tinhpiak le asi lai anti. Kei cu ka zum hlei fawn lo.

NLD luban nih an i tinh cemmi cu 2020 election ah Cozah ser khawhnak thutdan (seat) hmuh khawh kha asi. Pyine CM caah plan suai cia cu um rihseh Cozah ser khawhnak thutdan hmanh kan tlinh kho sual lailo tiah an lungre theih saling asi ve. NLD Baho nih pengkip khuakip ah Cozah serkhawhnak SEAT (MP) hmuhnak caah an zumhmi le a tei bak lai tiah an i bochanmi pawl kha an cuhter hna. MLA nakin MP ah an buai deuh lio asi. NLD nih MP a tling kho ding pawl kha Agent an thlah hna i an sungsan ter hna. Pengkip khua kip ah Agent an ngei hna. Cucu kawlram zongah an tuah mi cu hmuh khawh asi i Pine State zongah an ngiat hna.

Pu Zo Bawi zong hi NLD nih an zumh caah Cozah serkhawhnak ding thutdan Pyithu ah an thlengnak asi lai tihi ka zumh. Zeidang zeidang cu a um lem lai lo. An zumh i an i bochan caah MP seat cuh dingah an thlengnak asi ko lai. Amah belte Pu Zo Bawi cu bochantlak asinak kong NLD luban sinah a cawisangtu (recommend) Agent hi a hodah ansi hnga? Nangmah maw Keimah maw?Ahodah?Ruahchuk le ruahcho! ‎Jacob R. Thang