Laimi cu ram le pupa ram a ngeimi kan rak si hna. Atu lio kan buai ngaimi cu pupa ram ngeih le ngeih lo kongah hin a si. Halkha khualipi ah pupa ram a si tiin dum a tuahmi hna an um. Pupa ram kong he pehtlai in NLD Chin State Chairman Pu Zo Bawi nih a tanglei bangin a chim.

Hakha ah Pupa ram a ngeimi cu Aczoah nih an ngeih ning tein (ningcang tein) a tolrel ko hna

NLD Chin State Chairman Pu Zo Bawi nih, “Laimi ram le pupa hmun a ngeimi kan si. Ning cang tein hmunhma a ngeimi cu Cozah nih ningcang tein ruah piak a si ko. Nihinni ah Halkha ah pupa ram ee kan timi hi zoh tuah usih ca. A taktak ahcun, khika ahkhin dum kan tuah i hmairem, fangvoi le anṭam kumkhat hnih kan cinmi dakaw pupa ram ti kan timi hi zoh ah ngaihchia kan a si.

“Hakha khua ah pupa ram a ngeimi taktakmi hna cu aho zathang dah si, ahodarkhuah chung dah asi aho khenglawt dah si, aho dah si ti cu kan i thei dih ko. Hakha cu a bite mi a si.

“Sinain, khuate in kan ra hna i kan pupa ram asi tibantuk hna kan kaa in a chuahmi hi cu zoh ah kan miphun le kan ram kan dawt lo asi. A taktak ahcun, Hakha khualipi a ṭhanchonak ding ahcun Hakha minung nih kan sersiam awk a si.

“Pupa ram a ngei taktakmi cu cozah nih ngeih ning tein le ningcang tein a tolrel awk a si ko. Ningcang loin pupa ram asi, ka ta asi ti hi cu ruah lengmang tikah ngaihchia zong a si i ningzak zong a si. Hakha khua sersiamtu si loin a rawkral tertu kan si sual ahcun kan caah mi vanchia kan si,” tiah Pu Zo Bawi nih cun a chim.

Hluttaw in Ralkap an ṭum hlan lo chung paoh cu NLD nih Pohmah 261 kan remh bal lai lo.

“Khuate lei kan kal ah NLD nih Phunghram Pohma 261 remh an duh lo an ti bantuk hna an chim. Democracy ram ahcun mipi nih thimmi lawng kha Hluttaw ah ṭhut phung asi.

“Kan zoh a si ahcun kanmah bantuk, Indonesia ram khi kanmah bantukin aanasin uknak in democracy ah aa thlen tikah Hluttaw ah ralkap an ṭhu taktak 100% ah 30% an ṭhu. Annih cu kum 6 (term 1) lawng an ṭhu i mipi thim lomi cu tiin an ngol (hnu an tolh).

“Sinain kannih ram ahcun kum 2010 in 2015 tiang an ṭhu cang. 2015 in 2020 tiang an ṭhu hoi, 2020 in atu zong ṭhut an duh rih tikah an lungput ruah tikah ngaihchia asi. Cucaah, ralkap hi Hluttaw an ṭhutnak bakin i thawn hna sehlaw mipi thimmi lawng Hluttaw ah ṭhu hna seh an ti ahcun an i thawn ni bakin Pohma 261 hi kan remh colh ko lai.

Cuaah, Hluttaw ah ralkap an um chung paoh le an ṭhut chung paoh cu Phunghram Pohma 261 kan remh bal lai lo. Pohma 261 kan lungfiang lo sual ah, Pohma 261 cu President nih Chief Minister (vuancichoh) a thim lai, timi phunghram a si.

NLD teinak kan hmuhchung paoh i ralkap Hluttaw ah an ṭhu i an um chung paoh chung paoh cu Phunghram Pohma 261 hi kan remh lai lo. Ralkap an i thawn ni bakah hi Pohma 261 hi remh dingin kan timi a si. Pohma 261 ningin kan chim ahcun President nih Chief Minister (vuancichoh) a thim lai, timi phunghram a si peng ko lai,” Pu Zo Bawi nih a chim-The Chinland Post