Tukum 2020 thimnak ah Pu Zo Bawi cu thimnak a lut ti lai tiah fekfuan in von theih a si cang. Naite ah a lut ti lai lo, tibantuk biachokvai tete ahung pah. Asinain, Salai Lungthli Tum nih fiang ngaiin amah pumpak facebook ah Pu Zo Bawi thimnak ah aicuh ti lai lonak kong cu a von tarlangh ve.

Hi kong he pehtlai in Salai Lungthli Tum nih hitihin a langhter,“ Hakha ah ralkap tih an nun tuk buin NLD flag a tar hmasa i party caah lungdong lo tein kum 30 leng caan a pemi Pu Zo Bawi cu tukum thimnak a lut ti lai lo, party hruainak lei ah thazaang chuah aa tim cang, amah meehmun ah Chinram Upadi Lutlai Sonny Thang Cung a lut lai tiah NLD upa sin in thawng ka theih. Lung cu a tha lo ngai, nain keimah caah cun zalawng deuh in NLD ka tanh kho cang lai tinak a si, ‘a pu Zobawi a um ruang ah a tanh hna’ timi bia a um hraw ti lai lo,” tiah a Facebook ah a tarlangh.

Cun, Mai Dawt Chin Sung nih hitihin a tarlangh ve; Pu Zo Bawi : MP ka cuh lai lo, NLD centre sin ah ca a chiah. 2020 Election ah Hakha peng Pyine in cuh dingah Pu Zo Bawi cu timh lamnak a ngei. Hakha pengah Pu Sui Thio cu PM cuh hlah seh law, Pu Lian Ceu lut seh tiah Pu Zo Bawi nih saduhthah len nakin Hakha peng NLD nih Pu Sui Thio an thim than.

Thantlang pengin MP Ni Sui Lian an thim nain Pu Zo Bawi nih, an khuami Pu Sui Khar Lian cu a luh ter nain Pi Ni Sui Lian nih Mee 9-4 in a tei caah Pu Sui Khar cu a sung.

Pu Zo Bawi cu NLD centre nih Pyituh ah cuh dingin July 23 NLD Candidate min an tar ah an langh ter. Pu Zo Bawi cu NLD centre sin ah a kal colh i, MP ka cuh lai lo tiah ca a chiah. Pu Zo Bawi ai ah Pu Tial Ling luh ter ko u tiah a hal hna.

Pu Zo Bawi cu 2015 lio ah a lungput a thalomi a si lengah a zertukmi a si caah Mee rak pe hlah u tiah Pu Ceu Hlei nih cathanh a rak chuah bal. Atu ah cun a lungput a that lomi a lang chinchin cang. Thantlang peng mee vaivuan dingah Salai Lung Thli Tum independent in an zuam ter lai.