Voikhat cu, dawr zuar awk ah tiah wholesale in dawr ah thil tamnawn ka va cawk i kan dawr hmai ka phan. Ruah a siap siap in a sur pah, a kik ngai fawn caah kan nau nu pakhat,dawr hngah a kan bawm mikha phone in ka hei chawnh, ” customer na ngei maw” ka hei ti. “Ka ngei lo” tiah a rak ka leh. “A si ahcun zaangfak nak ten thil luh rak ka bawm ta” tiah ka hei ti. A si nain a ka let ti loh. Ka lung chung ah ka ruah micu bawmh a ka duh lo caah maw a si hnga?A ngeihlah ruang ahdah si hnga? A si lo ah ka chimh mi a fian lo caah dah si hnga? A rak ka bawm hna maw? Bawm lo dah? bia hal nak tampi ka lungchung ah a hung chuak.

Unau bantuk in aidaw mi kan hawinu pakhat nih meh thaw taktak in a chuan i a rak kan coih. Kan ei dih in Suite nu a thaw tuk e na meh chuan mi cu tiah sms ka hei kuat. “Kai lawm tuk, Ka u Palian, Kan pa le nan nu cu zei thluk meh thaw chuan piak zong ah a thaw/thawlo ti zong chim an hmang lo i ka tha chia ngai…he he ” tiah a rak ka leh.

Mah ka vun langhter mi pahnih nih a ka ruahter ngai mi cu, Feedback(english) tilbakemelding (Norway holh) chimtthan/ lehtthan a biapit zia khi a ka fianter ngai. A tthat ahcun ( a ttha), a tthat lo ahcun ( a ttha loh), kan i lawmh ahcun ( kai lawm), kan duhloh ahcun ( ka duh loh), kan fian lo ahcun ( ka fiang loh) ti chimtthan,hal tthan le lehtthan a biapit ning khi a ka fian ter ngai ngai. A bik in a herh ngai mi kong le bang ahcun mi nih an kan chimh mi khi fiang te in theihfian a hau.

Kan bible chung zong ah feedback, tilbakemelding ( chim tthan,lehtthan, lawmhnak biachim) a biapit zia kha Kan Bawipa Jesuh nih thinghmuihma mizaw pahra a dam ter mi hna ahkhan hmuh khawh asi, Thinghmuihma in a dam mi pakhat lawng nih Bawipa kai lawm tiah a rak leh tthan tik ah kan bawipa Zesuh nih “khoika dah a dang pakua kha an um ne, an dam ve lo maw” tiah a hal mi kha hmuh khawh a si.

Cu caah cun u le nau hna a cung lei ka langhter cang hna bang in, nifatin kan nunnak, hawi le he, unau he, nu le pa he, midang dang he kan i pehtlaihnak le kan i chawnhbiaknak ah kan cung i thil an tuah mi, an chim mi pawl vialte ah (feedback, tilbakemelding, chimtthan, lehtthan, lawmh biachim) i zuam peng hna usih. Hi nih hin thil tampi a tthat lei ah a kan panhter hrimhrim lai. Credit: Thang Za Lian