Pu No Than Kap. ROM le ICJ: Rom kumpi ‘cozah’ lal vanglai ah, mipi in uknak duh loin an aihram ih an buai zik tinten, an siangpahrang in nawmnak phunphun – ramsa hrang sualawkter, Rom ih kaih ngah mi Salpawl thih tiang hriamhrei thawn sualawkter, tivek an tuahsak. Mipi in an zoh ih zohnuam ti tukah an kut an beng, an khir an zuang, Rawl Ei tiang in an hngilh phah thluh. Cutin an thinharnak, harsa tuarmi le ROM uktu lal tlunih an thinhengnak khal an hngilh phah ṭheu.

 

Rom uktupawl in an mipi thinlung lakpeng an thiam zet. Tulai kan Rampi buai celcel le mipi thinlung lapeng theitu cu MYANMAR IDOL. hi a si ding. Uktu lam khawkhan hrim mi a silo hmanah, mipi thinlung lapeng theitu cu a si hrimhrim! Buai Cin Thang ram ih um sungah Hahdam ten um phah phah thei tla a tha!

Tu ah Leitlun thuṭhennak sang bik Netherlands ram Hague khawpi ih um ICJ ‘International Court of Justice’ ah Myanmar cu Gambia ram in Rohingya miphun cimitter tum tin khin a si. Kan mualpho. ICJ ah thu a feh that lole ICC in UN Security Council ah. China tivek in duhsaktu in veto thaw hmanin hum theih lo ah cang thei kan si. Argentina in kan Pi, MAH le uktu dang hmin pum salin a khing fawn.

Rampi thawn uktupawl thawn khin buai tuar a si. Kan buai, an buai, rampum kan buai a si bik. Tlangmi hotu hrekkhat in mipi cu hotupawl thawn kan ding tlang ding kan ṭang khawm ding an ti. Khatlamah, Tlangmi ‘Kachin tvk’ mitam sawn in, tuvek can ah kum 70 sung kan Duhnak tel loin in uktu Kawl bawipawl kan dinpi lo ding, kanmah Tlangmi khal a phun phun in cimih in tum ve ruangah ICJ tiang thu kan thlenpi ve a tul ding, ti a si.

Chin miphun in ziangtin kan hmu in kan fehpi ve ding? 1️. In ukbettu thawn kan ding tlang ding, in uktu an si nan Bawi le lal sangpi pi tla in pe, tender ngah in paisa tampi kan ngah phah, an sualnak le palhnak khal kan khuh mawi ṭenṭo ding kan ti ding maw? 2️. Kachinpawl bangin “Kum tam Tlangmi in ukbettu le mipum mal sawn le sakhua dang betu thleidang ih retheih phunkim petu cu ralkap an si maw, si lo maw, kan dinpi thei lo, an phu tawk tuar hai seh!” kan ti ding? Tuvek can ah kan hmuhdan, lungput le fehdan in Chin miphun hi ziangvek kan si ti a langter zet ding .

HMINSIN: Hminpum langin khinmi uktu Bawi le Lal pawl lakah Tlangmi pakhat hman an tel lo. Kawlram pi cu, 1. UNHCR; 2. UN Burma Rapporteur 3. UN GS special representative; 4. FFM; 5.IIMM; 6. ICC; 7. ICJ UN Hngepi 7 in zoh ringring a sizo.