Chin National Party(CNP) chairman thar Pu Lal Maung Cung. Pu No Than Kap le Pu Ngaisak hruaimi party CNLD nih aa-naa hmang in uico thawl bang zohchia tuk in an thawl hnu ah Pu Lal Maung Cung cu Chin party pakhat a si vemi CNP ah a lut cang.

CNP nih Chiram chairman rian zong an pek chih fawn. Amah nih MP caah candidate thim khawhnak le kawl khawhnak nawl a ngei lai. Thantlang peng Pyine No 1 candidate ca zong ah PU LMC cu CNP nih an fehter cang.

CNP hi an dirhnak a sau pah cang, nain an hruaitu cheukhat cu CNLD he an i fonh i a tangmi cheukhat nih CNP cu an hruai. Atu cu Pu LMC nih a dirhkamh hna lai caah Thantlang peng ah cun thawn pah te dawh an si. Salai Lungthli Tum

Lal Muang Cung nih CNP party a luhnak kong he pehtlai in a facebook ah hitihin a tar,”Ka dirhmun chiat lioah lunglawm tein a ka cohlang tu Chin National Party (CNP) Chin Miphun Party cungah kai lawm. Ka tawk ka phu lo Party rian lian pipi zong an ka pek chih. A ruah hlan ah Thantlang CNLD zung thing ah CNP zungthar on khawh kan i zuam lai.

“Dawt mi miphun hawidawt vialte hna ka tlamtlin lonak le ka chamh baunak ka ngaithiam u law kan dirpi in kan bawm than u tiah zaangfah kan nawl hna. Thantlang peng Miphun party chungtel vialte le lung rethei ngaihchia mi kan EC vialte kan upat tuk hna, nan cungah kai lawm tuk, lungrual tein miphun caah kutsik than dingin zaangfah kan nawl ko hna. A ruah hlan ah tlamtling tein thawngthanh nak ka rak tuah te lai,” tiah a facebook ah a tar.