By Sang Hre: Kan unau Falam lei hi khuaruah kho le mifim ngai ngai an si. Chin mi nih kan pa pakhat ah kan i chiah ve mi Rev. Dr Hre Kio cu Hakha peng – Zokhua mi a si nain Falam nih an siangbawi pakhat dirhmun ah an chiah. An lungthin a pical caah a si.

Chief Minister Pu Lian Luai hi CM a tuan hlan ah Hakha-Thantlang nih tampi kan thei lai ka zumh lo. Pu No Than Kap tu cu hlan tuanbia thing ruangah tam deuh nih kan thei cio lai tiah ka ruah. Asinain, an pahnih konglam tha tein hlet tikah Falam peng ca cun Pu Lian Luai hi an i rinh chan ngai mi bochan tlak upa pakhat a rak si ve.

Falam nih kum sautuk rak teltum le buaipi mi Surbung airport pi cu a mah CM a tuan chan bak ah chuak lak in an tuah tuan khawh caah tutan thimnak ah hin Pu No Than Kap nak in Pu Lian Luai nih a tei deuh lai tiah ka zumh. Zei ca tiah Falam lei kan unau hi khua ruat kho le thiltha conglom a thiam ngai mi an si theo. Thang tuk in a au mi pawl nak in dai te le khuatuak tan buin lo hma a la mi nih adonghnak ahcun teinak an hmuh theo.

Relchih: “Myanmar Ram Hruaitu Caah Cun NLD Hi A Tha Bik Ko” Ralkap nih kum 60 chung duh tawk i an cilnaanmi le an sawksam cangmi ram, a sa thawtnak vialte an ei dih cang i a ruh lawng a tang cangmi ram, 2008 phunghram tang i remh le thlopbul cu vuleicung thil har bik a si ka zumh. Cuti bu cun NLD cozah nih kum 5 chungah tampi a remh cang ti cu hmuh cio a si ko.Kan duhning belte cu a si kho deuh rih loh. Caan pek rih an hau. Cucaah NLD cozah na mawhchiat hlan ah, a tang i langhtermi kong khi fakpin ruat hmasa.

(1) America President Donald Trump khi Kawlram President rak tuanter hmanh, cozah hmasa Immigration Officer (lah-wah-kah) pawl nih Tuluk le Bangali pawl phungning loin rammi sinak sing (ting) tampi an rak pekmi hna kong a ruah vial hmanh ah hri in aa awk men lai. (2) Russia President Putin zong khi Kawlram President rak tuanter ngat, phunghram remh awkah ralkap pawl lemsoi an harning kong a ruah vial hmanh ah a kan zaamtak diam lai.

( 3 ) Singapore Prime Minister ( hlun) Lee Kuan Yu kha va sawm ve hnik ca, cozah hmasa pawl leiba kong a ruah vial ah aa teng colh lai i a thi diam lai. (4) Mi rorum bik Philippine President Duterte tah vaa sawm tuah ngat, zarh khat hmanh a bawi manh lai lo, ralkap nih an tlaih colh lai i uknak an lak dih lai.

Kawlram buainak a ummi kip ti awk – economics, drugs, eihmuarnak le phungbuarnak vialte ah ralkap kut neh aa tel dih. Cozah nih a tawlrel deuh paoh ah ralkap pawl nih” Uknak kan lak lai” tiah an i hrocer lengmang. Egypt democracy kong kha ruat hmanh. Mohamed Morsi nih 30 June 2012 ah president a tuan i ralkap pawl kha dimdorh lo tukin rian a tuan caah ralbawizik Gen.Abdel Fattah el-Sisi nih cozah uknak cu 8 june 2014 ah a chuh diam ko khah. Lee Kuan Yu thiamnak a langh khunnak cu Singapore ram hmete, dodaltu um lonak ram ah amah duhning paoh in a hruai khawh hna caah a si ko.

Donald Trump nih miphun tanhnak kong duh paoh in a aupi khawhnak cu America ram cu vuleicung ah a rum bik, a thiam bik le a thawng bik ram an si caah zei hmanh nih a dawn lo. Mi lungkhong pa Duterte nih raltha taktak in Philippine ram a hruai khawhnak cu Philippine hluttaw ah ralkap 25% an um lo pinah, an ralkap vialte khi amah kut tangah an um dih caah a si ko.

Aa lo lomi hi rak tahchunh hlah. Kawlram sining le ram dang sining cu aa thlau tuk. THIS IS MYANMAR. NLD cozah nih zeihmanh a tuah loh ti hlah,tampi a tuah cang. Atu i a lang colh rih lomi Long-term Plan zong tampi a um rih. NLD hmanh nih a tuah khawh rih lomi cu mi zei nih dah a tuah khawh hlei hnga? Ruat setmat loin mawhchiat hlah. Kawlram uktu caah cun NLD Party nak tha deuhmi a um lo caah NLD hi vote rak pe cio ko hna u sih. Credit: Victor Pa