Kawlram le AA i kahdohnak ruangah maw harnak a tongmi chinmi kan tampi cang. Cu lawng si loin kawl ralkap nih Chinmi mi tampi bomh le meithal kahnak ruangah a thimi an tam tuk cang. Khua hmanh ah um ngam loin ram tangh hna ah an zaam i khua le ram chuah takin ramdang le khua dang a pemmi an tam ngaingai.

Ramkhel leiah Chinmi kan pa pakhat a simi Pu No Than Kap zong a ṭhu sawhsawh kho ve hrim lo. A facebook cahmaiah Kawlca le Falam ca in a lungfahnak kong a ṭial ve. Falam ca in a ṭialmi cu a tangah Kawlca in a ṭial chih ṭhan. A poi ko. Paletwa kan unau hna hi zei can tiang ah hitihin an tuar lai?

Pu No Than Kap nih a ṭialmi cu, “Phungning loin cawlcangmi misual/ralhrang nan timi hna nih an pum himnak ah tiin khua/ram chungah an i thuh manh ah, sualnak zeimanh angei lomi mipi hna an duh le thi chih ko hna seh ti tiangin bomb le mithal kah a herh maw? Hitlukin fahnak tuar lengmang dingah Chin Miphun nih zei bantuk sualnak dah kan tuah i kan ngeih? Chin tualleng ngakchia hna vansang mitthli he an ṭah-aihramnak hi a lak in a luang hrimhrim lai lo,” tiah Pu No Than Kap nih a ṭial.

Lungthin a tongh ngaimi pakhat cu hmanthlak a tarmi tete hi an si. Pu No Than Kap a lungfahnak tete a ṭial hnuah a caṭialmi tanglei ah cun Paletwa kan unau hna an zaamnak hmanthlak le sualnak ngei lo ngakchia tete an temtuarnak hmanthlak tete a hun tar chihmi nih mi lungthin a ṭahter. Zaaangfak taktak an si ko.

Paletwa kan unau hna kong he pehtlai in thawngpang dang rak rel chih: A Poi ko. Kawl ralkaap le AA i kahdohnak ruangah Paletwa Chinmi nunnak aliammi an tam ngaingai cang. Paletwa peng, Nanchaungwa khua cu April y suimilam 3:00 hrawngah Myanmar (kawl) ralkap nih raltuknak vanlawng 2 in an kah hna ruangah Chinmi minung (7) nunnak a liam i minung (8) nih hliamhma an tuar i inn (7) a kang dih tiah theih a si. Naite zongah Bawngwa khua pawngah inn 13 an kanghpiak hna i minung (2) hliamhma an tuar hoi cang.

Nanchaungwa khua hi inn (40) hrawng a ummi Chin khua pakhat a si i zeiruangah dah Kawl ralkaap nih atu bantukin Nanchaungwa khua hi an kah hnga ti aruang theih a si rih lo nain an zumh bikmi cu khua pawngah AA ralkaap an um ruangah a si lai ti hi zumh bikmi a si. Paletwa peng Khumi Mino Bu secretary a ṭuan liomi Salai Aung Soe nih a chimmi cu, “Paletwa khua in meng 10 hrawng a hlatnak ah a ummi Nanchaung Wa khuate ah April 7 zaanlei 4pm hrawng khan vanlawng(raltuknak) 2 nih voi 1 kah ah bomb 2 bak hmangin an kah ruangah an khua cu Bomh 4 nih a den hi a si,” tiah a chim ve.

“Atu bantukin thil a hung can tikah Nanchaung khuami hna cu an khua ah um ngam ti loin ral an ṭihnak ruangah a hlan ah khua tak in Paletwa khua ah a zaammi hna hi minung 2,000 an hrawng an si cang i atu hi bantukin a hung si ṭhan tikah an tam chin lengmang cang,” tiah Salai Aung Soe nih cun a chim chap. Chirhchan: Chin World/Khumi Media Group