Hakha peng EC nih state hluttaw No.1 caah Pu Zo Bawi (mee 18, Pu Moses Thla Cung (mee 11) le Pi Hoi Sung cu mee thlak in an thim hna i Pu Zo Bawi nih a tei hna. State hluttaw No.2 caah Pu Sui Thio (mee 11), Pu Lian Ceu (mee 10) le Pu Sonny Thang Cung (mee 7) cu mee an thlak hna i Pu Sui Thio nih a tei hna.

NLD party mumal le phunglam ah mee a tambik a ngahtu kha pakhat khat a can sual ahcun thimnak tuah hau ti lo in mee tambik chang kha thim ding timi policy an ngei. Asinain, Hakha peng NLD candidate thimnak asiloah Pu Zo Bawi hmunhma kong ah NLD nih an phung an buar ko lo maw?

Hakha peng le Chin ramkulh huap EC nih an fehtermi cu Pu Zo Bawi a si, nain central nih Pu Zo Bawi cu na duh zong ah cepa, na duh lo zong ah cepa ti phun in Pyithu hluttaw ah cuh ding in an fehter. Asinain, Pu Zo Bawi nih central ah ramkulh hluttaw No.1 ah cuh ding in aa zuam than. Asinain, a tlamtlin lo ruang le Pyithu hluttaw cun teinak ka hmu kho lai lo ti a ruah caah maw a si hnga, i cuh lo ding in biakhiahnak (withdraw) a tuah than.

NLD policy le phunglam ningte in siseh, Democracy phunglam ning zong in Pu Zo Bawi aa cuh than lo ahcun dengteo (direct) in Pu Moses Thla Cung kha an cuhter awk asi. Sihmanhseh law, State hluttaw No.2 ah aa zuam i ticket a rak ngah lomi le mee tlawmbik a hmutu Pu Sonny Thang Cung tu kha State hluttaw No.1 ah cuhter ding in NLD nih an fehter. Hihhi khuaruahhar ngaite a si, a si awk hrimhrim khi a si lo. Hi an tuahsernak nih democracy phung an zulh lo lawng si lo in party policy le phunglam an buar bak a si. Pu Moses Thla Cung caah lungfah awk ngai a si. A ruahzia thiam in ka lung a fak lo ti hmanhsehlaw hmailei tuanbia le hmailei mino caah lam a phittu tuahsernak a si tiah ka ruah.

Hi kong ka tial tikah minung pumpak hnorsuan duhnak a pelte hmanh aa tel lo. Pu Sonny Thang Cung an thim thanmi cung ah ka lawmhpi ko. Amah hi ka hua hrimhrim lo. Asinain, Party policy le democracy phung an buarmi kha ka langhter duhmi a si.

Pu Sonny Thang Cung hi Laimi nih kan i bochanmi Upadi thiamsang pakhat a si. Ka uar ngai. Pu Sui Thio he an I zuam lio ah a tei khawh men tiah ka rak zumh ngai, a nain Pu Sui Thio nih a tei. Amah zong nih a ka dawt i kei zong nih ka dawt ve. 2015 NLD cozah thar kai ka te ah Pu Sonny Thang Cung nih zei paoh a si ah ka P.A (PSO) na tuan lai tiah a ka sawm. Tuan ding zong kaa tim nain ka rak tuan than lo. Cu tluk in pehtlaihnak tha a ngeimi kan si ko.

Sihmanhsehlaw, zeiruang ah dah democracy lamhruang vattu NLD nih hi bantuk ningcanglo in rian an tuan hnga? Sahngar ni na, arpi tap na, phun si lo in kaphnih caah a thami le lungtling a simi tuahsernak he hmainor hna sehlaw zeitluk in dah a va dawh hnga mu.

Salai Holy Tawk Tling Thang
August 1, 2020