Surnge khuami a inn hrawh piak a tongmi Pu Cin Thawng nih,“Ohsuh pakhat khua li kan si caah (Surgnen, Tisen (A), Tisen (B) le Sentung) kanmah Surngen ahhin Ohchozihmuh um seh kan ti i, mee kan i thla i amah nih a ka tei. Amah hi, kanmah nih kan mee kan pek i kan ṭuantermi a si. Hihi hmeh piak law rak rel chap

“Ca peknak kong he pehtlai in, Pu Chan Hre nih anmah nih ca chia an ka peek a ti. Ca cu amah nih June 13 ah voihnih tiang a kan pek. Ca a kan pekmi cu kan hmuh tikah kan duh lo caah, August 10 a ca kan pek ve. Surngen, vawlei, lam, ti le mei kan hman lo dingmi hmun cu kan sawh piak uh tiah kan ti hna.

“Cun, a chim rihmi cu anmah nih kan velh ti lawng a chim i kanmah a kan velhnak kong cu zeihmanh ah a rel lo i a chim duh lo. Pu Chan Hre cu kan inn i ka hawi le minung 6 (amah he Pu Cin Thawng he pa 6) meeting kan ṭhu hna lio ah August 10 zaan ah a rak ra.

“Kan innka cu a ke a chuih pah cun innchung leiah a rak lut. Hodah ca a ka pe, nan min von i chimh uh hodah a ngamh tiah a kan ti. Ziah mah ti cun na kan ti tiah keimah nih ka leh i, zeidah ca ca nan ka pek. Nanmah cu mi zeidah nan si, nan min von i chimh uh a ti a nolh peng. Cun, Lehhmat (minthut) ka kuat piak uh. Lethmat cu kan ca kan pekmi kan rak thut lo nain, khua in na ṭhawlmi minung 11 kan ti ko khah tiah ka leh. Ka duh lo, nan min hrimhrim thu, taza kan i cuai (ṭan) hna lai a ti.

“Kan thut ko lai kan ti i minthutnak ca a von lak tikah, kha ti khan duh lo tiin, a hrocer i a cawlcang len. Ka nau le nih cun nan kan luh hnawh taktak ko maw tiin Pu Chan Hre cu an tlaih i an nam. Mino upa lei in Thang Cin le Zakia a ratpi hna. Kan inn chungah cun, kan au a thang tikah, mizapi an ruak i cuticun kan inn cu thingtan le lung he an hrawh dih i kanmah tiang cu a kan vuak,” tiah Pu Cin Thawng nih cun a chim.

Khuami Pu Lian Ceu Thang nih a chim ve ṭhanmi cu,“Ka nupi nau a pawi lioah Cozah nih a kan bawmhmi phaisa a firmi ka fir lo a ti caah, fianternak tlawmpal in ka von tuah lai. Cozah nih kan nupi Sui Hnem naupawi mi caah tiin Thong 45000 a kan bawmhmi cu, keimah nih ka lak piak hna lo tiah a chim.

Rianṭuantu lei ka hal tikah, ka nupi Sui Hnem ca i Thong 45000 cu Ochozihmuh kan pek timi hi tluk tehte a um ko bu ah, keimah nih ka lak piak hna lo a ti. Vawlei cung ah lihchim zuamnak um sehlaw, Noble Price laksawng pek awk a tlak ka timi a si. Mah tluk tete a um ko mi, lih le rokhrawl in a chim ngammi ko mi hi cu khuruahhar taktak mipi tia kei nih cun ka ti,” Pu Lian Ceu Thang nih a chim.

Nizaan biaruahnak an ngeihnak ah Pu Chan Hre nih a chim ve mi cu,“Pu Cin Thawng inn ah thil sining fiang deuh theih le hal ah ka va kal. Pu Cin Thawng inn ahcun, minung (chungkhar 11) chungah minung 6 cu meeting an rak ṭhu. Keimah te lawng cun ka va lut. An ka timi cu zeidah (zeidah na duh) an ka ti.

“Pu Chan Hre tiin pumpak in ca nan ka pekmi hi a ho nih ṭa-uan a lak lai, min ka thut ka piak uh. Hi bantuk hi patling pakhat nih ca i pek phung si lo. Vawlei, ti, mei hna hi ahohmanh nih mah tein ngeih khawh lomi a si i khuami caah a si. Khuami caah a si cun, nawlngeitu sinah chim ding a si.

“Khuami caah si loin, keimah pumpakin nan ka peekmi si caah, nan duhnak paoh kan i yinsan (kan kal ko lai) ko lai. Mah caah cun min nan thut hau. A hodah ṭa-uan la lai, a duhmi nih thu ualw a duh lomi nih cun thu duh hlah uh ka ti hna.

“Anmah lei nih cun, kan ngamh kan thut ko lai. Kanmah nih a phoih (phu) 11 kan si i an ti. Surngen ah a phoih ramkhel (batazi)lei ti dah lo cu, kanmah Ochoh nih kan theihmi um lo. A phoih timi bia hi chim hlah u ka ti hna i, cu cang ka cun an dihlak in an dir dih.

“Na kan rat hnawh maw an ka ti. Rat hnawhmi si lo, ca hi minsen thu u kan timi hna si. Hriamnam he rat hnawhmi si lo. Minsen tu hi ka thut piak u, zung ah chuahpi ding a si. Nan cabia ning bangin ka ra mi a si ka ti hna i, kan ngamh kan thut lai an ti. Min thut an timh ah, min thutnak a si lomi, ka min tangah thut an timh i, nan phoih zong ka si ṭung lo, ka min tangah cun thut si lo. Catlap dang thu u ka ti hna i cu cang ka cun an ka vuak colh.

“Pu Cin Thawng nih that u,that u tiah a ti hna. Keimah lawng ka si caah, ka chanh u, an ka thah cang lai hiteh tiin ka au i, a leng ummi tlangval pawl nih an theih i, an rak ra. Mipi an rat thi he kai ciah cang. Buainak ka duh lo, kan chuak hna lai tiah, bawmh dingin a rami pawl cu ka ti hna.

“Keimah bawmh awk ah a rami, tlangvaal pahnih he kan chuak i keimah hmai ka sa, cu ahcun tlangvaal pakhat cu an tlaih i thingtan in voi 5 an rak tuk i hliamhma a bu. Khuami nih lengah rak chuak u, an ti hna i an thingtan a alh liomi he a alh lomi an rak ka chuah hnawh i lamkam ah ka naupa Thang Cin an velh rih. Anmah lei minung pakhat cu khuami nih an velh. Inn chungah an zaam ṭhan.

“An velhnak ah ka thi chuah tikah zeiruangah kan Ochohmuh pa hitihin an vuak tiin mipi an ngaihchia i an ṭap. Ṭap hlah uh, Ochozihmuh ka si i, keimah a ka velhtu hi aho le ho dah hihi cu upadining tein ka lai ka ti hna. Cu cun, buainak hi a thawkmi a si.

“Anmah lei nih an chimning ahcun, annih cu sualnak ngei lo an si. Asinain ka hmuhning ahcun, anmah ca an ka pek hmasa i, min ka va thutter hna ah Pu Cin Thawng te inn ah velh ka tong. Keimah bawmh dingin a rami lila cu an rak velh hna,” tiah Pu Chan Hre nih cun a chim.-Chirhchan-Hakha Times Daily Newspaper

Admin hmurka: Chinworldnewsvening nih thawngpang kan ṭialmi hi kanmah nih kan phuah cawpmi kan ṭialmi a si lo. Mipi sinah adikmi thawngpang zamh hi kan i hmuitinhmi a si. Cun, thawngpang kan tialmi hi areltu mipi caah thathnem santlaih, theihtlei ṭha siseh ti hi kan i hmuitin bikmi a si. Asinain, minung kan ti cu tlamtlinlonak tete zong a kho mi a si caah thawngpang kan tialmi kan palhnak a um cun theihter khawh peng kan si.

Mipi sinah thawngpang thlazamh piak na duh si cun zeitik caan paoh kan i thlahzamh piak khawh zungzal hna. Kan thawngpang ṭialmi kongah, pehtlaih a duhmi nih Salai J Vanduhthar Lahnin ah pehtlaih khawh peng kan si. Cun, kan ca a kan rel piaktu nan dihlak cungah kan ilawm. Upatnak he-Admin