Pu Henry Kawlram President si dingin seihku an yin. Lungthli an tum lo. Seihku an yin. Mipi thimfung ruhnak ah lemsoinak hriam ṭha ngang cu si lai. Laimi nih Kawlram pumpi president si khawh ding cu Lai mipi zong nih duhpiak ciomi cu si ko lai. Acheu nihcun amah zong nih ai lun, an ti. Thim ṭhan tik cu ka reng kai deuh lai, tiah ai ruah ti si. A dotdot tein reng kainak cozah rianṭuan bal a si caah, si lai. A mawh lo. A reng cu kai lai maw? Nemmam! NLD nih 2020 kum i cozah a funtom khawh hmanh ah, Chin miphun nih rampi president tlaihter ding cu an ngamh lai lo.

Kawlram cu Prime Minister ihruainak multi-party system in a rak kal bal. Cu hlan deuhte ah, Kawlrambu ser dingin Aung San nih a rak leem khawh hna caah, ramthar ser tikah, rampi president cu tlangcung miphun chungin a chawn in ichawn (reciprocal) dingin an rak timhlamh. Zalennak a hmuka Kawlram president hmasabik ah Sao Shwe Thaik (စဝ်ရွှေသိုက်) a rak si. Shanram chung i Mirang nih Yawnghwe an rak timi Nyaung Shwe bawi (saopha, sawbua) a rak si. Nupi voi nga bakte a rak ngei bal.

Nain 1962 ah Ne Win nih Kawlram uknak a rak lak lio ah an rak thah. Ne Win nih Kawlram uknak a rak lak lio ah thisen chuak lo tein uknak rian kan ikhinh an rak ti. Nain president Sao Shwe Thaik cu an rak thahmi a si. Amah lawng cu an rak thahmi a si tiah an ti. Cuticun Newin kut in Than Shwe kut ah Kawlram cu aa rak ichep.

Suu Kyi hruaimi NLD nihcun U Nu chan tlangcungmi nih president phunphai ichawn phun in ṭuanter ding cu an duh pah. Nain, Kawlram phunghram ningah President in ihruainak phun in an suai. Tikah, Vice-president pathum bakte thim an si. Cu lakah pakhat cu ralkap ta si hoi. Cucaah tlangcungmi caah cun, Vice-president hmunhma tiang lawng Kawl ho ruahnak nih a phanh rih. NLD chan ah U Htin Kyaw cu a dam lo ti ruangah president rian in aa din. Tlangcungmi pa President ṭuanter duhnak thinlung an rak ngeih ahcun U Win Myint kha an va char a herh lo. NLD nih Second Vice-President ah an rak ichuahpi cangmi Pu Henry Van Ṭhio kha direct in forward an rak tuah awkte a si. Cu hnu ah Pu Henry hmunhma ahkhan U Win Myint kha rak char hna sehlaw, aa dawh deuh ning cu si hnga.

A phung men in thimfung an thlaktermi hna kha cu “showcase” sawh a si. Kawl sen lellul lakah, zei cu dah congnak aa hruk ṭung i awtaw mei a lu ah aa chinhmi pa cu an va zumh hna hnga! Ram lu bik caah Kawl party nih Tlangcungmi cu toter an ngamh tak rih hna lo ti a lang. 2020 Thimnak cu Pu Henry nih MP ngah sehlaw, President lei hmunhma cu an pe ti lai lo. Kachin maw an pek hna lai, siloah Karen dah an pek hna lai. Anmah caan si cang. Nain, Pu Henry cu ministry pakhatkhat ah a lu bik silo hmanhah deputy hrawnghrang cun an irawihte khawh. Caṭialtu: Salai C Alexander