Surngen Ohsuh bawi Pu Chan Hre le a ṭapeh pawl nih khuami hna an vuak hna i sizung an phan. Cun, an inn lo an hrawh piak hna timi kongah, amah Surngen Ohsuh bawi Pu Chan Hre nih mipi sinah thil sining fianhternak a von tuah cang.

Pu Chan Hre,“Pu Cin Thawng inn ah thil sining fiang deuh theih le hal ah ka va kal. Pu Cin Thawng inn ahcun, minung (chungkhar 11) chungah minung 6 cu meeting an rak ṭhu. Keimah te lawng cun ka va lut. An ka timi cu zeidah (zeidah na duh) an ka ti.

“Pu Chan Hre tiin pumpak in ca nan ka pekmi hi a ho nih ṭa-uan a lak lai, min ka thut ka piak uh. Hi bantuk hi patling pakhat nih ca i pek phung si lo. Vawlei, ti, mei hna hi ahohmanh nih mah tein ngeih khawh lomi a si i khuami caah a si. Khuami caah a si cun, nawlngeitu sinah chim ding a si.

“Khuami caah si loin, keimah pumpakin nan ka peekmi si caah, nan duhnak paoh kan i yinsan (kan kal ko lai) ko lai. Mah caah cun min nan thut hau. A hodah ṭa-uan la lai, a duhmi nih thu ualw a duh lomi nih cun thu duh hlah uh ka ti hna.

“Anmah lei nih cun, kan ngamh kan thut ko lai. Kanmah nih a phoih (phuu) 11 kan si i an ti. Surngen ah a phoih ramkhel (batazi)lei ti dah lo cu, kanmah Ochoh nih kan theihmi um lo. A phoih timi bia hi chim hlah u ka ti hna i, cu cang ka cun an dihlak in an dir dih.

“Na kan rat hnawh maw an ka ti. Rat hnawhmi si lo, ca hi minsen thu u kan timi hna si. Hriamnam he rat hnawhmi si lo. Minsen tu hi ka thut piak u, zung ah chuahpi ding a si. Nan cabia ning bangin ka ra mi a si ka ti hna i, kan ngamh kan thut lai an ti. Min thut an timh ah, min thutnak a si lomi, ka min tangah thut an timh i, nan phoih zong ka si ṭung lo, ka min tangah cun thut si lo. Catlap dang thu u ka ti hna i cu cang ka cun an ka vuak colh.

“Pu Cin Thawng nih that u,that u tiah a ti hna. Keimah lawng ka si caah, ka chanh u, an ka thah cang lai hiteh tiin ka au i, a leng ummi tlangval pawl nih an theih i, an rak ra. Mipi an rat thi he kai ciah cang. Buainak ka duh lo, kan chuak hna lai tiah, bawmh dingin a rami pawl cu ka ti hna.

“Keimah bawmh awk ah a rami, tlangvaal pahnih he kan chuak i keimah hmai ka sa, cu ahcun tlangvaal pakhat cu an tlaih i thingtan in voi 5 an rak tuk i hliamhma a bu. Khuami nih lengah rak chuak u, an ti hna i an thingtan a alh liomi he a alh lomi an rak ka chuah hnawh i lamkam ah ka naupa Thang Cin an velh rih. Anmah lei minung pakhat cu khuami nih an velh. Inn chungah an zaam ṭhan.

“An velhnak ah ka thi chuah tikah zeiruangah kan Ochohmuh pa hitihin an vuak tiin mipi an ngaihchia i an ṭap. Ṭap hlah uh, Ochozihmuh ka si i, keimah a ka velhtu hi aho le ho dah hihi cu upadining tein ka lai ka ti hna. Cu cun, buainak hi a thawkmi a si.

“Anmah lei nih an chimning ahcun, annih cu sualnak ngei lo an si. Asinain ka hmuhning ahcun, anmah ca an ka pek hmasa i, min ka va thutter hna ah Pu Cin Thawng te inn ah velh ka tong. Keimah bawmh dingin a rami lila cu an rak velh hna,” tiah Pu Chan Hre nih cun a chim.

Surngen Ochozihmu Pu Chan Hre a bawmtu Pu Thua Hmung nih a chim ve mi cu,“ Kum 2015 Ochozihmu i thimnak ah Pu Chan Hre hi a tlingmi a si. Kan pa le nih Pu Chan Hre thangchiatnak an chimmi vialte kha a dik lomi lawng te a si. Anmah pawl kha Ochozihmu rian tlaih a duhmi lawng te an si hna. Rian an hmuh lo caah Pu Chan Hre an hnahchuahnak hi a si.

“Amah hi, Mino te asinain a lungsau i khua le ram caah biatak tein a rian a ṭuanmi a si. Khua le ram caah bawmhnak tampi a chuahpitu zong a si. Khuami le nuhmei ngakṭah zong nih an tlaihchan taktakmi a si. Cucu an hnahchuah caah a rian hi phuah hna seh ti an duh caah atu bantukin an dohkalhnak hi a si. Tukum 2020 zong khuami hna nih nangmah nih na kan peh piak lai tiin vok sumh 5 he a nulepa an nawl hna. Nain, a nulepa nih an duh lo. Khuami nih an hnek lengmang hna caah, an cohlan hna. Khuami nih cun kum 2020 hi amah nih ṭuan rih ti hi an duhmi a si.

“Ka pale Pu Chan Hre a dohtu hna hi, ahlan ah Zazakah rian a rak ṭuanmi zong an um hna. Anmah pawl an ṭuan lioah cun, anmah le anmah hmanh aa rem lomi an si. Pu Chan Hre cu report an tuah lengmang nain, an tuah kho hlei lo. Anmah pawl hi kan khua le kan ram ah duh paoh in a ummi (nungmi) an si. A rum zong an rum, a fim zong an hna. Cu tikah mipi zei ah an kan rel lo i, an duhsalam in a ummi an si hna.

“Pu Chan Hre nih hin phoih (ṭapeh) zong a ngei lo. Anmah kha minung 11 an si i anmah tu kha a phoih in dirmi an si hna. Pu Chan Hre cu khuami a dirmi a si. Pu Chan Hre nih anmah pawl nih an velh hmasat caah, khuami nih an chuah hnawh hna i an velh ve hnanak a si. An chimmi vialte kha lih in an ṭawntokmi lawng te a si.

“Anmah pawl nih Ochozihmu rian an tlaih ahcun, khua a dam lai lo (khuami caah a fak lai) an ti caah, Pu Chan Hre zong amah ṭuan ṭhan dingin an nawlnak a si. Tutan buainak a chuah hi, Pu Chan Hre ruangah a si lo. Khuami nih an in khawh ti lo caah puainak hi a chuaknak a si,” tiah Pu Thua Mang nih cun a chim. Chirhchan: Hakha Times Daily Newspaper

Ohsuh bawi Pu Chan Hre kong pehtlai in, Pu Ni Khuai nih a chimmi cu,“Atu bantukin Surngen khua kan buainak hi hlanchan kan pipu chan lio zongah a um lomi le atu keimah chan lio zongah a um bal lomi a si. Pu Chan Hre Ohsuh bawi a hung si hnu ah, kan khua ahhin tazacuai le buainak lawng tein a khat i kan ngaih a chia ngaingai.

“Atu bantukin buainak a chuahnak a ruang bik cu, lam kong ahhin a si. Tisen B le Surngen lei lam cu Acozah nih tuah dingin bawmhnak an kan peek. Tisen B in Surngen lei lam cu cawh dingin Acozah nih an kan ti. Ohsuh bawi Pu Chan Hre nih hihi cu keimah nawl a si, hihi cu keimah nih ka hmuhmi a si caah keimah nawl in ka cawh ter lai i Surngen lam cu a rak cawhter hna.

“Cucu Tisen B nih an duh lo. Kan lam peih a si ve cu an ti i a Acozah nih a tining tein kan tuah piak uh tiah ca an ṭial. Kanmah inn dong 11 hna (Pu Lian Mang, Pu Van Peng le Pu Cin Thawng telh in chungkhar 11 he i hmuh thiam lonak an ngei) nih Acozah nawl peih kan ngeih a hau. Acozah nawl kan ngei hna lo a si ahcun, an kan cawh ṭhan sual lai kan ti caah, an chimmi cu kan lungtlinpi hna. Cucaah Surngen lam a cawh lomi tiin kan pawl cu a kan buai hnawhnak hi a si. Kan buainak a hrampi cu lam kongah a si,” tiah Pu Ni Khuai nih a chim.

Velh a tongmi Pu Cin Thawng nih,“Tutan i ka lungretheihnak le kan ningṭihnak le nganfah (fahnak ka tuarmi) ka innak cu, Pu Chan Hre le a ṭapeh pawl nih an kan tuahtoning hi ka lungfak tuk. Cu hleiah ka ning zong ṭi tuk.

“Pu Chan Hre le a a ṭapeh pawl nih a inn an hrawh piakmi cu keimah Pu Cin Thawng hi ka si. Kanmah pawl hi Cozah ti ning in ṭuan seh tiin, a lungtlingmi kan si. Cucu Pu Chan Hre le a ṭapeh pawl nih an duh lo, ka inn zong an hrawh viar. Cu lawng si loin a velh zong an kan velh chih rih. Mawngtlang sizungah ka kal i cu ka cun ka thlopbul. An fale zong kan vuak rih hna lai an ti caah, ka fale zong a nu le pa a fale he Falam a upa sinah an zaam. Kannnih hi a tu Hakha ah kan i dor lio a si,”tiah Pu Cin Thawng nih a chim.

“Pu Chan Hre nih a rian in nan dinh ter lo ahcun, khua kan hlam ngam ti lai lo. Amah hrimhrim ralhrang lungput a ngeih caah kan ṭih, ahopaoh kan ning a ṭi. A hmanmi minung hna hi zeihmanh khua a ruat huaha lomi, mi thah le nawn zong a ṭih lomi phun deuh khi zuu a dangh hna i a hman hna caah kan khualei zong kan ṭih. Kannih cu ralhrang ṭih in a rak zaammi, ralzaam dirhmun in a ummi kan si.

“Thil sining cu kan chim dih cang ko i hmaihlei zeitin dah kan um lai ti le kan ṭhut dir lai ti cu cunglei nawlngeitu cozah nih a ṭhatṭhatnak le a herhning in hma nan kan lak piak uh,”tiah Pu Cin Thawng nih cun a chim chap. Chirhchan: The Chinland Post

Admin hmurka: Chinworldnewsvening nih thawngpang kan ṭialmi hi kanmah nih kan phuah cawpmi kan ṭialmi a si lo. Mipi sinah adikmi thawngpang zamh hi kan i hmuitinhmi a si. Cun, thawngpang kan tialmi hi areltu mipi caah ṭhathnem santlaihnak, theihtlei ṭha siseh ti hi kan i hmuitin bikmi a si. Asinain, minung kan ti cu tlamtlinlonak tete zong a kho mi a si caah thawngpang kan tialmi kan palhnak a um cun theihter khawh peng kan si.

Mipi sinah thawngpang thlazamh piak na duh si cun zeitik caan paoh kan i thlahzamh piak khawh zungzal hna. Kan thawngpang ṭialmi kongah, pehtlaih a duhmi nih Salai J Vanduhthar Lahnin ah pehtlaih khawh peng kan si. Cun, kan ca a kan rel piaktu nan dihlak cungah kan ilawm. Upatnak he-Admin

https://www.facebook.com/THECHINLANDPOST/videos/1290280868030932/