Surngen Ohsuh bawi Pu Chan Hre le a ṭapeh pawl nih Surngenmi an velh hna caah sizung tiang an phan. Cheukhat cu an inn le lo tiang hrawh piak an tong. Cun, Pu Chan Hre le a ṭapeh pawl ṭih ruangah khua a zaam takmi zeimawzat an um cang.

Tutan buainak kongah, Ohsuh bawi a simi Pu Chan Hre nih mipi sinah thil sining fianternak a von tuah ve cang. A chimmi cu, “Khuami nih an ka velh i, keimah lawng ka si caah, ka chanh u an ka thah cang lai hih tiin ka au. Mipi nih an kan zawn hnawh colh i, an ka bawmh.

“Keimah zong ka palh kho ko. Nain, ca an ka pek hnu ah, keimahtu an rak ka velh i, keimah chanh dingah a rami pawl nih, a ka vuatu hna cu an velh vuak ve hna. Pu Cin Thawng inn zong an hrawh. A hnu ah, Palek an ra i Palek pawl nih nan i rem kho lai maw an kan ti i, a ka vuatu hna kan i rem kho lai lo, kan duh lo an ti.

“A thaizing ah anmah pawl cu an rak ra i Vok (sumh 5) he ngaihthiam an ka hal. Khuami nih an duh lo caah an kir ṭhan. A hnu ah, Sia i put in an ra ṭhan i, ca kan in pekmi kan palh, kan in vuakmi zong kan palh. Kan ngaithiam uh tiah ngaihthiam an ka hal ṭhan. Cuti a si cun tiin, Hnariang sakhan ah remnak ser a kan kal.

“Hnaring kan sakhan ahcun, nan i rem kho lai maw tiah an kan hal tikah, i rem dingin an ti. Keimah an ka hal ve tikah, i remh cu a ṭha kho ka ti i lungtlinnak (Sachoh) kan tuah. Sachoh kan tuah dih hnu ah, Pu Cin Thawng nih Sia kan liam chungin kei cu ka thoh uh (ka phiat uh) ulaw, ka inn pi cu keimah tein ka rem lai a ti. Cucu kanmah nih kan in let kho lo kan ti.

“A hnu ah a timi cu, ka inn hi teh na remh lai maw a ti. Cin Thawng khuami a si a inn zong khuami nih an hrawhmi a si ko caah, a inn hi nan rem piak lai ka ti i, lungtlinnak (Sachoh) zongkan tuah chih. A hnu ah, Pu Cin Thawng cu a rak ra ṭhan i, phaisa ting 15 nan ka peek lo ahcun ka duh lai lo. Phaisa ting 15 ka pe ulaw, keimah tein ka inn cu ka remh lai a kan ti.

“Sachoh kan tuahning tein kan tuah lai kan ti i, a thaizing ah pumpek in letama a thiammi paoh nan rak chuak dih lai. A thizing cu thlalang le thilri cawknak ah tiin ka si khawh tawk tein phaisa ting 1 kai put ve i, thlalang hi keimah phaisa tein cawk piak uh, khua le ram daw le rem tein khua kan sa hna lai ka ti hna.

“A thaizing cu va chuak kan ti hna i inn rem dingin an va kal ah, Pu Cin Thawng nih phaisa ting 15 nan kan liamh duh lo. Cucaah ka inn cung nan kai kho lo. Phaisa ting 15 nan ka pek lo ahcun ka inn cung nan kai kho lo. Ka inn cung nan kai ahcun, upadi ning tein taza kan i cuai lai a rak ti i, inn rem a kalmi hna cu zei bia hmanh loin, an rak ṭin hna,” tiah Pu Chan Hre nih cun a chim.

Pu Cin Thawng nih a chim ve mi cu ,“Tutan i ka lungretheihnak le kan ningṭihnak le nganfah (fahnak ka tuarmi) ka innak cu, Pu Chan Hre le a ṭapeh pawl nih an kan tuahtoning hi ka lungfak tuk. Cu hleiah ka ning zong ṭi tuk.

“Pu Chan Hre le a a ṭapeh pawl nih a inn an hrawh piakmi cu keimah Pu Cin Thawng hi ka si. Kanmah pawl hi Cozah ti ning in ṭuan seh tiin, a lungtlingmi kan si. Cucu Pu Chan Hre le a ṭapeh pawl nih an duh lo, ka inn zong an hrawh viar. Cu lawng si loin a velh zong an kan velh chih rih. Mawngtlang sizungah ka kal i cu ka cun ka thlopbul. An fale zong kan vuak rih hna lai an ti caah, ka fale zong a nu le pa a fale he Falam a upa sinah an zaam. Kannnih hi a tu Hakha ah kan i dor lio a si,”tiah Pu Cin Thawng nih a chim.

“Pu Chan Hre nih a rian in nan dinh ter lo ahcun, khua kan hlam ngam ti lai lo. Amah hrimhrim ralhrang lungput a ngeih caah kan ṭih, ahopaoh kan ning a ṭi. A hmanmi minung hna hi zeihmanh khua a ruat huaha lomi, mi thah le nawn zong a ṭih lomi phun deuh khi zuu a dangh hna i a hman hna caah kan khualei zong kan ṭih. Kannih cu ralhrang ṭih in a rak zaammi, ralzaam dirhmun in a ummi kan si.

“Thil sining cu kan chim dih cang ko i hmaihlei zeitin dah kan um lai ti le kan ṭhut dir lai ti cu cunglei nawlngeitu cozah nih a ṭhatṭhatnak le a herhning in hma nan kan lak piak uh,”tiah Pu Cin Thawng nih cun a chim chap.

Note: Live in biaruahnak an ngeihmi chungin kan rak ṭial chinmi a si caah kan palhnak a um ahcun, nan kan ngaihthiamnak lai kan in nawl duh hna. A Video kan chiah chih i ngaih khawh a si.