Pu Ca Awi A Mawttaw Pahnak In A Thi Kongah Fianternak Kan Vun Tuah Than

Pu Ca Awi (44) thihnak kong fianternak. Dauchim khuami, Hakha thar um Pu Ca Awi (44) a thihnak kong ah The Hakha Post le The Chin Journal ah Hakha Palik Sakhanhmu U Thein Zaw Oo chimmi siseh, a dang thawngzamh ca i an tialmi tete ah a hman lomi a tam caah a sining tak cu a tanglei bantukin a si tiah mawtaw ngeitu le mawngtu lei nih fianternak kan hun tuah.

1. Mawtaw a ngeitu (Soe Thura Win) le a mawngtu (Win Hlaing Oo) hi Kawl Lunghau khuami, kanmah Laimi an si.

2. A mawtaw hi Thawlazi license a ngeimi Lifan mawtaw, SKAT mawtaw tia dengmang a si.

3. A mawngtu hi tlangval kum 26, mawtaw mawngh cawnnak license lawng a ngei rih mi a si.

4. Pu Ca Awi hi a fanu tualleng kaimi don ah a kal lio a si caah zanlei sml 3:00 hrawng (2019 Aug 29 ni) ah hi thil a ton hi a si.

5. Major Kep Lo lungdonh pawng ahkhin orhleikam lamkil tein a kal lio a si. Cuka ahcun lung pon le these pon an um. Lung pon a hei lonh i these pon zawn a phak ahkhin a hnulei in mawtaw nih cun a liang ah a rak pah caah these cungah a boktakhup in a tlu, a ke ah mawtaw hmailei ke nih a rak rial pinah, mawtaw hnulei ke nih a hun rialchih rih, cu lawng si loin mawtaw hnulei ke cu Pu Ca Awi a ril komi phei le tai cungah cun a dir. A mawngtu pa cu a vung tum i a mawtaw ke tang ah a um komi Pu Ca Awi a ai len kha a hei hmuh tikah mawtaw cungah a kai than i a hei thial. Pu Ca Awi hi siizung zong an phanhpi ko nain a nunnak nih a celh hrimhrim lo caah zanlei sml 6:00 hrawng ah a kan liamtak hi a si. A kan thihtak tiang ah lungfim tein a um i thil sining zong fiang tein a chim khawh dih.

6. Tantakmi chungkhar an ngaihchiatnak hrawmpinak le lenkainak zong kan ngei i Khrihfa lungput tein an kan chonhbiak caah kan i lawm.

7. Thil sining a hman lo ning in thawng a thangmi tete a um ruangah a sualpalhtu lei kan lung a that hrimhrim lo caah hiti hin fianternak kan hun tuahnak a si. The Hakha Post