US President Donald Trump nih White Hous pi i Press Conference an ngeihnak ah vawleipi nih a buaimi cuahmahmi le ramkip nih a ṭih tukmi zawtnak phunkhat a simi Covid-19 (Coronavirus) hi doh dingin US cu timhcia (ready) a sinak kong a chim phuan.

Press Conference ah hin Trump nih cun ramchung i Covid-19 a kar cuahmahmi ven himnak caah rian a ṭuanmi hna ṭhihruaitu dingah Vice President Mike Pence a chiahnak zong a chim chih fawn. US Centers for Disease Control (CDC) nih cun US ah hin Covid-19 zawtnak nih a tlunhmi hna hi minung 60 an um cang tiah a tar i hi hna lakah a tam u cu Japan tipi kam i lawng an chiahmi, Diamond Prinecess cruise ship in US ah a rak lutmi hna an si tiah CDC nih a langhter.

US ah hin hi zawtnak ṭihnung Covid-19 a ngeimi hi minung 60 tling cang ti CDC nih phuangzar hmanhsehlaw, Trump nih cun hi zawtnak hrik a karh cuahmah hi an ram ah cun a karh chin khawh lonak dingin kilven khawh a si tiah thawngzamhtu nih an tar. Trump ṭhihruaimi Cozah nih US ah hin Public Health Emergency an phuan hleiah ramdang in US ah a rak tlawngmi hna zohfel dingin le hi zawtnak chungin i ven himnak caah ram dang tilawng rak hrenpiak hna dingin thawngthanhnak a tuah fawn.

Ramchung ah Covid-19 zawtnak hrik a karh chin lengmang ruangah US le South Korea nih ralkap (military) exercise ngeih dingin timhlamhnak an ngeihmi zong an let phah i China chim lo ah cun South Korea ah hin hi zawtnak a ngeimi hi an tam bik tiah theih a si fawn. Hi zawtnak hi a ngeimi China ram ah cun 80,000 hrawng an si cang ti a si. World Health Organisation (WHO) nih cun Covid-19 zawtnak hi ram 47 ah a phan cang tiah a tar ve i atu lio ah hi zawtnak hi Italy, Iran le South Korea ah a karh raan tuk ralrin taktak a herh cang tiah WHO director general Tedros Adhanom Ghebreyesus nih cun a chim.