President Trump Nawl Peknak In Iraq& Syria Um Ralhrang Hmun An Phomh Taktak Cang: Cacawn nithumni ah Baghdad- Iraq chak lei 27km hla ah a um mi US led Forces umnak Camp Taji cu rockets 18 hmangin a ho ti theih lo nih an kah hna caah US ralkap pahnih le British ralkap Lance Corpl Bridie Gillon nunnak na liam. US President Trump nawlpeknak in Iraq le Syria ramchung um Shia muslim ralharng, Iran nih a bawmh mi hna umnak hmun nga cu Jet fighters hmang in an bomb hna i, a thimi le hliamtuar mi theih khawh si rih lo.

US nih hin drone le missile hmang loin raltuknak vanlawng hmang in ralhrang hna hmunkhur hi an kah. Tutan ah US nih an kahmi hna ralharng hi Popular Mobilization Front an timi, March 2018 thawk khan a thazaang a tthawng ngaimi le Iraq chung hmun tampi ah nawl a ngeimi an si. Cu pin ah Iran cozah nih dirpi in phaisa le hriamnam in a bawmh tawnmi hna an si. Cun, Hash al-Shaabi an timi Iraqi pawl umnak camp zong bomb piak an si.

Hi kongah US Defense Secy Mike Esper nih a chim mi cu, “Thil umtu ning kong President Trump ka ceihpi cang i, a herh ning in lehrulnak nan tuah lai a ti bantukin a herh ning in kan kal peng lai,”tiah a chim. US Congress nih President Trump nih hnatlaknak lak hmasa loin Iran kahnak nawl hi an khampiak caah asi. Khampiak hna hlahsehlaw Iran hi cruise missile he phomh ding khi si cang.

Hi kong he pehtlaiin President Trump a chim rihmi cu a herh ahcun Congress nih an pass cang mi zong, a Presidential power nawlngaihnak “veto” hmang in hlonhpiak a hreh lonak kong cu a chim cang. Pentagon zong nih Iran thil tuahmi hi lehrulnak pek le pek lo kongah zeihmanh chimphuan mi a um lo, sinain Iran military al-Quds forces hna nih an dirpi ngaimi ralhrang hna hi hloh dih a timh hna in a lang. Iran cu direct tuk lai zumh si lo. Mark Esper nih News Conference ah, “Kan military bases le kan mi le sa nunnak a liam mi hna rak hngak ko rih u, tiah ralhrang pawl cu a hro hna. President Trump nawlpeknak in US nih Iran military challang, pasaltha le mi ralttha an timi al-Quds chief Gen. Qassam Soleimani a thahpiak hna kongah Iran hi nihinni tiangah a lungfahnak a dam kho lo i, a dirkamh mi ralhrang hmangin Iraq um US military bases hna cu rocket le missile hmangin a kah tawn hi si.