Admin||05|Biangreithlep-09|2020||Coronavirus kong he pehtlai in US White House nih thanhnak an tuah ṭhan cang. White House press Secretary Kayleigh McEnany nih mipi sin ah thanhnak a tuah. A himning ah cun US Vice President Mike Pence i a rianṭuantu staff cu hneksaknak tuah hnu ah COVID-19 positive a si e tiah a fehter. Kan hnu cacawn nilini ah khan CNN nih an thanhning in President Donald Trump a bultawltu pakhat cu positive a si tiah an rak thanh cang. A tu hi US White House chung ah rian a ṭuanmi minung pahnih bak nih coronavirus zawtnak hi an ngeih cang tinak a si.

Zohkhenhnak felfai taktak tang ah mithiam hna nih an kan chimh cawnpiak ning in himte in chiah an si. Cun hi innpi hi a himnak ding caah felfai chin lengmang in kan zohkhenh i rianṭuantu hna zong nih biapi bik ah chia in rianṭuan a si. Hi White House chung ah ṭhate in kan zohkhenh ko hna. America rampi himte in kan hun ṭhan bantukin White House zong himte in kan zohkhenh ko tiah McEnany nih a chim.

Hi pulrai zawtnak coronavirus ruang ahhin vawleicung ah minung 270,000 renglo an thi cang. Theih khawhtawk vawleicung ah hi zawtnain in a zawmi hi minung 3.84 million an reng ti loh ti a si ṭhan cang. Hi bantukin kan langh termi nak in vawlei cungah hi zawtnak a ngeimi le hi zawtnak ruangah a thimi hi an tam deuh hrimhrim lai. Zawtnak an ngeih le ngeihlo hneksak khawh lomi hna le ram cheukhat nih a sining taktak in a chim duh lomi zong an um ko lai tiah Johns Hopkins University Center for Systems Science and Engineering hna nih an chim.

Kan theih dih cio cang bantuk in hi pulrai zawtnak hi December 2019 ah China ram Wuhan khua in ai thokmi a si. China ram in ai thokmi zawtnak a si ko nain a tu tiangah cun United States ah hi zawtnak in a zawmi le a thimi an tam cem rih. A tu tiangah United States ah hi zawtnak in a zaw cangmi hi minung 1.2 million renglo an si cang. Cu chung ah hi zawtnak ruang ah a thi cangmi hi minung 75,781 paoh cu an si cang lai tiah an chim chih. Ref: ABC News