Vawlei mi vialte nih theihning in nihin ah vawlei mipi a kan that cuahmah tu coronavirus cu China ram Wuhan sahring zuarnak hmun in ti a si. Hi zawtnak hi zei tin dah ai semning a si timi kong ah mithiam pawl an ruahnak ai khat kho ngaingai rih hna loh. A sinain a fiangmi thil pakhat tu cu China nih hin thil a canka te in mipi sin ah thawngthanhnak a tuah loh ti hi a si. Cu lawng silo in hi zawtnak ruang ah a ram chung mipi a thimi zat zong tlamtling in a chim loh ti cu hmuhchuah a si cang.

Hi zawtnak ai thoknak China Wuhna khuapi ah mithi zat an rak thanhmi nak in a let 50% bak in a thimi an tam deuh tiah Wuhan City government nih an thanh tthanmi nih hin China nih hi zawtnak kong ah biafiang a chimlo cu fiangte in a lang. Tihni ah Citi covernment nih soial media sin ah an chimmi cu tuan deuh i hi zawtnak ruang ah a thimi zat rak thanhmi nak in minung 1,290 nak in a thimi hi an tam deuh tiah an chim. Cu caah hi Wuhan khuapi ah coronavirus in a thimi hi an dihlak in minung 3,869 an tling cang. China ram pumpi ah a thimi zong an hung karh i minung 4,632 an phan.

Cu lawng silo in Wuhan khuapi chung ah zawtnak a ngeimi tiah rak thanhmi nak in minung 325 in a hung tamdeuh hoi. Cu caah hi zawtnak a ngeimi dihlak hi minung 50,333 an tling cang tiah a cozah nih an thanh beh. Tuan deuh te hrimhrim khan ram tampi hna nih China cu a ram chung ah zawtnak a ngeimi le hi zawtnak ruang ah a thimi zat a thanhmi kong ah an lung a tling loh i an rak soisel cang.

US President Donald Trump nih hi zawtnak kong ah hin China nih a thanhmi hi a zumhlo kong a rak chim cang. Thangpangthar van theih hnu in Britain le France hna zong nih Trump cu an dirpi colh. Britain Prime Minister Boris Johnson a damlo chung ah a aiawhtu Britain Foreign Secretary Dominis Raab nih cun China sin ah hin bialehding a har taktakmi halding kan ngei tiah a chim.

France President Emmanuel Marcon zong nih hi zawtnak dohnak ah hin China cawlcangh a ttha tiah rak ruah ve top cu a diklo taktakmi a si. Midang nih theih le hngalh lomi thil a cangmi a um hrimhrim ko tiah a chim fawn. A sinain Russia President Vladimir Putn nih cun China cu a aukanh. Hi bantuk in an chimmi hi China thangchiat bia le hnapneh timh bia a si tiah a chim.