Van Bik Sawmhal By Keimah Ruangah Mi Kip Nih An In Huat Hna Lai. Kan Laimi chungin Pu Trump a huatu hna hi zoh hna tikah a tam uu cu US ummi an si ahcun Lai lei nupi ai cah i a nupi a au kho lomi le a chungkhat a au kho lomi deuh an si. Kan ram ah a ummi an si ahcun Pu Trump a term chungah US kalnak visa a sungh lengmang mi deuh an si ve i, ramhnihnak a ummi an si ahcun ralzam refugee a la ti lo ti ruangah an si ve.

Cheukhat cu vawlei pumsa nuamnak le zalonnak a tlaihchan tukmi an si, anmawh ve lo, kan zumhnak le kan thlarau thazaang a der cang ahcun thinlung le ruahnak vialte cu vawlei lei ah an kal dih tawn ko.

Mah bel cu mi sawhsawh hi cu ruahthiam a um deuh Khrihfabu ah Khrihfa upa pipi le zarhpini fatin te pulpit cungin thawngṭha a chim lengmang mi pastor pipi zong nih Pathian bia Bible he kalh in nun a duhmi an phunglam hehceh tiah nan ṭanh i nan aupi ve hi cu thinlung sia herh lo awk nan ṭha hrim lo.

A ngaingai te ti ahcun IS chan ah khan mibu lakah bom puah le thahnawnnak a tam tuk caah Pu Trump nih ramdang mi ralzam lakah hin miṭhalo misual an i tel chih lengmang a ti caah US ram ah ralzam tampi luhter kha a pih khar deuhnak a si. Cuhcu a ram le a miphunpi a dawt hna caah a si.

Pu Bama chan ah nitlak ram Midle lei vialte cu misual ngawgcik hmang hna le misual phu dang dang nih Khrihfa mi vialte cu tam tuk te an hrem an rak thah hna, Khrihfa biakinn tam tuk te mei in an rak khangh piak hna. Cu vialte cu Pu Trump chan ah an lo i an dai dih cikcek ko hna. An umnak lungkua thingkua chung tiang a dawi hna i an chi a hmih dih hna.

Annih pawl nihhin vawlei cungah Khrihfa biaknak hi um ti lo ding tiangin an duhmi a si. Atu zong hi a phung men in Khrihfa min cu an i tlaih ko, sihmanhsehlaw an chungin an duhmi taktak cu Pathian duhnak tuah kha si loin anmah duhmi tuah tu kha an duh deuhmi a si.

2016 lio ahkhan Pu Trump nih teinak rak hmu hlah sehlaw annih pawl nihhin nihinni tiang kan uk rih hna sehlaw vawlei hmun kipah Khrihfa mi vialte hi zeidah kan lawh cang hnga? Ruat ngam hmanh a si lo, mi thling a kik ko, biakinn ah kal in Bawipa hmanh kan thanhṭhat ngam in kan thangṭhat nuam ti hnga dek maw?

Khrihfa mi vialte nih kan sunsak tukmi kan Bawipa Jesuh chuakcamtuak Christmas min zong um ti lo dingin an kan tuah cang, sianginn le cozah zung kipah Bibla cacaang an tarmi tete hna zong hrawh dih dingin an rak aupi len kha mu, an chungin rul, an cungin ṭhuro an si zia hi a fiang tuk ko lo maw? Bawipa nih fian khawhnak inpe ko hna seh.

Vawleicung Khrihfa mi vialte thinlung ah a dai kho bal lomi Jerusalem khuapi zong Israel khuapi ah a ser ṭhan khawh hi zei tlukin dah Khrihfa min a ṭhawnter i Khrihfa mi hna thinlung a damter, zumlotu hna pennak chungin Khrihfa mi vailte a kan chanhchuah tu a si.

Cucaah Khrih min ruangah zumlotu hna le liberal minung, a phung men in khrihfa ai timi vialte nih amah cu nan doh i nan huatnak a si ko, uktu le pentu ngei lo ramlak i a tlawngmi ningzak zong a hngalh lomi ramsa bangin hurduhcuainak phunphun he zalonnak nun a duhmi paoh nih amah cu nan huat hi a si.

Kannih Khrih zumtu fa a simi hna cu khatikhan a nung thiam ding kan si lo, sertu kan ngei, uktu kan ngei a man in cawkmi kan si, thisen in thlanhmi kan si, zalonnak duh ruangah kanmah duhduh in a nung ngam ding kan si lo, hi vawlei ahhin zungzal kan um fawn lai lo, zungzal kan inn cu kan Pa Pathian sinah khin a um. Vawlei ah kan pumsa duhmi nuamnak le zalonnak hna hi kan tlaihchan tuk ahcun kan thlarau nih khi zungzal nunnak ram khi a phanh kho te sual lai lo. Luke 21:17 Keimah ruangah mi kip nih an in huat hna lai.

_____

Copyright © Chin World News Evening