Sagaing ramṭhen, Depeyin peng, Hpoketantaw khua ah tlaih a tongmi tualchung ralkap 5 chung ah ralkap 4 cu SAC ralkap nih an thah hna i, pakhat cu a tlau, tiah tualchung mi nih an chim. Hpoketantaw khua cu August 9 ahkhan SAC ralkap 100 nih luhhnawh in um hmun an khuar. Khuachung thil sining hlathlainak a tuahtu tualchung hriamtlai phu chungtel 5 hna cu August 13 zaanlei ah tlaih an tong, tiah min langhter a duh lo mi khuami pakhat nih a chim.

Khuami pakhat nih cun, “Thah a tongmi cu 4 an si i, an lu ah an tuk hna caah an lu cu zoh awk ṭha lo in an rawk. Fak tuk in an hrem hna hnu in an Kaa ah mei thal in an kah hna. Nihin August 14 zinglei i khuachung kan luh ah an ruak kan hmuh hna,” tiah a chim.

Inn 300 hrawng khuasaknak, Hpoketantaw khuami 800 leng cu a luancia zarh khat hrawng khan hmundang ah kan zaam hna, tiah Hpoketantaw khuami hna nih an chim. Minung zakhat reng lo in rallam a sialtu SAC ralkap hna nih August 2 ahkhan, Depeyin peng khua hna ah lut in khuami 50 reng lo cu an rak tlaih hna, tiah tualchung mi nih an chim. Credit: The Chin Post

Thawngdang: Mizoram ah Leiba Ruang ah Chinmi le Chinmi i Thahnawnnak a Chuak! Mizoram ah leiba i cawh ruang ah Chinmi le Chinmi karlak thahnawnnak le ruak hlohnak a chuak, tiah thawngpang kan theih. Khuabung ah a ummi Pu Hrang Than Ceu (kum 37, a cung hmanthlak) nih sumdawng Pu No Khen Do (kum 42) cu sobul in a lu ah voi tampi a tuk i a thah hnu ah an innthlang tiluhor ah a ruak cu a hlonh. Pu Hrang Than Ceu hi aluancia kum 3 ah khan a chungkhar he Khuabung ah a rak peemmi an si (Ralzaam an si lo). Khuabung an um hnu ah thing-aah in pawcawmnak a tuahmi an si.

Pu No Khen Do hi Kawlram in Mizoram ah Electric thilri le innsaknak thilri pawl a zuarmi sumdawng a si. Pu Hrang Than Ceu nih Pu No Khen Do sin in thing-aahnak hluah pakhat a baa in a rak lak. Pu No Khen Do nih leiba a vung hal tik ah bia i elnak a chuak i Pu Hrang Than Ceu nih Pu No Khen Do cu a lu le hmai tibantuk pawl ah sobul in voi tampi a tuk i a thah.

A ruak cu innthlang pe 20 a sannak tiluhor chung ah a hlonh i a ruak hloh a timh. Sihmanhsehlaw, khuami palik sin ah an report i, nizaan August 13, chun sml. 11:00 ah khan Pu No Khen Do ruak cu palik nih an vung char. Mithattu Pu Hrang Than Ceu zong nizaan zaanlei sml. 2:30 ah palik nih an tlaih i, Champhai District biaceih zung ah taza an cuai, tiah thawngpang kan theih.