Pi Zai Par Fathum Faphir Hna Cu Dr. Sa Sa Nih Min A Sak Hna A Min Sakmi Hna Aṭha Taktak
Chin ramkulh Hakha ramkulh ngandamnak zung riantuan Pi Zai Par nih faphiar pathum (nu-2, pa-1) cu March 5, 2020 Hakha siizung siibawi le nurse hna operation in a ngei tiah thawng kan theih. Cu a ngeihmi cu Dr. Sa Sa nih a nu paw chung a um lio in min aa sak cang tiah theih a si. Faphiar pathum min cu Bible ca chung min char in a chuak hmasabik nu cu Merry, pahnihnak cu Marta le a pathumnak pa cu Lazaru tiah Dr. Sasa nih min a sak hna hi a si. Merry cu pound 5, Marta hi pound 4.5 le Lazaru hi pound 4.5 cio an rit hna tiah theih a si.
“Faphiar pa thum a si lai tiah Hakha siizung result an theih cia hnu ah Dr. Sa Sa min kan sakpiak an ti i Merry, Marta le Lazaru a si hi a si. Dr. Sa Sa hringtu a nu hi Pi Zai Par i tleicia a nu le chung a si” tiah a chungkhar nih The Chinland post ah an chim. “Faphiar pathum ka ngeih hi Pathian thawng a si ko. Operation a si tikah ka re a theituk lo. Ngakchia an ngandamnak caah thlacam kan bawm cio ko u” tiah Pi Zai Par nih The Chinland Post ah a chim.
Pi Zai Par cu Thantlang peng Leitak Zipi khuami Pu Vai Hup le Pi Tial Sung an fanu a si i Hakha ramkulh ngandamnak zungah zungthianhtu in rian a tuan cuahmah lio a si. Hringtu a nu taktak Pi Ma Sui Khin(tleicia) a si i Pi Zai Par kum (2) a si ah a thihtak. Pi Zai Par cu a va Pu Ni Er he fanu pakhat le fapa pakhat an ngei i a tu faphiar he cun fa (5) an ngei cang tinak a si. Credit: The Chinland Post