Lunglawmhnak thawngpang ngaingaimi a simi cu, Chin ramkulh, Paletwa peng chung ah AA hriamtlai le Kawl ralkap kahdohnak ruang ah harsatnak a tongmi ralzam hna ca ah Hakha Dawrhlun a ummi Pu Ram Cung nih ting 50 a hlut, tiah kan theih.

Paletwa ralzam ca ah tiin Pu Ram Cung nih ralzam hna ca ah a hlutmi tangka cu March 3 ah Chin state Cozah biachimtu sipin vuanci U Soe Htet nih cohlannak a ngeih hi a si.

Chin State Cozah biachimtu Sipin vuanci U Soe Htet nih cun “Paletwa ralzam hna ca ah zawnruahnak he atu bantukin Pu Ram Cung nih a hlutmi hna tangka cu Paletwa peng ah a ummi ralzam hna sin ah a rauh hlanah pek khawh kan zuam lai ,” tiah a chim.

” Atu bantukin zawnruahnak he Paletwa ralzam hna caah Pu Ram Cung nih a hlutmi tangka cu Chin state cozah aiawh in keimah nih ka cohlan. Chin ramkulh cozah aiawh in kan i lawm tuk tiah chim ka duh. A rannak in Paletwa ralzam hna sinah phakter khawh kan i zuam lai,” tiah Sipin Vuanci U Soe Htet nih a chim chap.

Atu hi Paletwa le Kyauktaw lam hi kahdohnak ruangah phih a si i, Paletawa khuachung ah facang cawk awk zong a um ti lo i lungreithei vansang au in an um, tiah khuami sinin kan theih. Naite zongah Paletwa le Matupi karlakah lampi ah ei ding phurtu 12 motor zong AA ralkap nih an kham i mei an khangb bal cang khuami sinin theih a si. Credit: Hakha Iprd