Pathian Tello In Khrihfa Ttha Si Khawh A Si

Sermon

Pathian Tello In Khrihfa Ttha Si Khawh A Si

Image result for thlarau

Mi pakhat cu Khrihfa feltuk le tthatuk a si i a hnu cun Pathian tello in a tlamtling, a nung kho timi nan theih bal hna maw? – Mah kong cu tutan tlawmpal in ttial ka duh.

Zei thil paoh tuah lengmang ahcun mi a lem, a phung ah kan ruah. Satbing (cycle) cit kan cawng i kan pum le kan thazang hman zia kan thiam hnu ah zeidang ruah hau ti lo in kan duhnak ah kan i cit khawh. Cu bantuk in kan kal lengmang nak lam zong ruah hau lo in kan zulh khawh. Zeipaoh hi kan tuah lengmang ahcun a kan lem, nunphung bantuk ah an cang.

Cu tikah Pathian tello in nun i zuam caan hi kan i hngalh lo kar in a rak um kho. Asinain Pathian nih an pek lo ahcun mit-tthep kar zong thaw na chuah kho lo ti cu na hngalh. Thinlung in hngalh timi le thluak in theih timi belte hi aa dang. Thlacam a ttha ti na theih, i an lem cang caah na tuah peng. Pathian ka herh tuk tiah na ruah caah a si lo caan a tampi. Na hawi maw mi dang nih zeitindah thla kan in cam piak lai tiah an in hal tikah “ka chambau maw, siloah mi sual maw ka si?” tiah na lung in na ruat. Na tlamtling, na hlawh tling. Na fel tuk i na nunnak naa uk khawh tuk caah a si.

Related image

Bible rel a ttha tuk ti na hngalh i na rel lengmang caah an lem. Asinain a bia ah na rawlttam lo. Ni khat hnih rel lo kha a poi na ti lo, a ruang cu a cauk ning in a lutaw na leh cang cu ta. Khrihfabu na herh na hngalh fawn. Zarhpini tin naa pum. Asinain mah cu Khrifa hawi dang he tthan tti le Pathian biak tti ruah ah a si lo, an leem cangmi nunphung a si caah a si. Mi dang sin in thazang naa lak lo, i mi dang zong na sin in thazang an la hlei lo.

Pathian aa tellomi Khrihfa na hngalh bal lo ahcun nangmah kha van i ruat, van i dap ta ve. Nangmah hna na si sual maw? Khirhfa tampi hi kan felnak le kan hmet te in kan tuahmi Khrihfa phung hna ruang ah Pathian a thlaumi kan tampi sual hnga maw?

A cunglei bantuk a si ahcun na tlai tawnmi thei na tlai lo. Na nun a hul tinak a si.

Jesus bia: Keimah hi mitsur ruang cu ka si i a nge cu nanmah hi nan si. Ahohmanh ka chungah a um i kei zong a chungah ka um ahcun, amah cu thei tampi a tlai khomi cu a si; zeicahtiah keimah loin nan tuah khawhmi zeihmanh a um lo. (John 15:5) Rome 8:14 ah “Pathian thlarau nih a hruaimi hna cu Pathian fale an si.” a ti. Thlarau theitlai hi mitsur ruang ah aa hngat. Zeitluk caan sau hmanh mitsur phun rak si law, nangmah tein na tlai kho lo tinak a si.

Chim duhmi cu thil ttha tuah phung, felnak nih a hruaimi hna si lo in Pathian thlarau nih a hruaimi hna kha a chim duhmi a si. Thil ttha tuah le Pathian thlarau cu an kal tti awk a si ne lo maw? Minung tthatnak ruang ah a si lo caah ti ding a si lem lo. Thil ttha cu tuah khawh chung tuah ding a si, nain cu thil ttha kan tuahmi ruang ah Pathian kan thlau sual in kan philh sual maw ti hi mahhi ca tawite nih a ruahmi a si. Pathian thlarau kha pakhatnak a si i thil ttha tuahnak cu mah thlarau i a theitlai a si ding Bible cawnpiakmi cu a si.

Image result for khrihfa nun

Cuti mitsur ruang i kan i pehtlaih ko ahcun Bible kan relmi, thla kan cammi hna le biakinn ah i hawikomhnak kan tuahmi hna hi lawmhnak, tthangthatnak le a tthami theitlai an chuak lai. Pathian tello in kan nung kho lo ti le Pathian cung ah lawmhnak le thangtthatnak kha “tlang par i a ceumi mei bantuk” in a lang in a theitlai mi nih an ei ko lai.

Khrihfa nun ahhin Pathian ngaihnak le hlamnak nih kan leem ve sehlaw ti hi ka ruat:

Salm 42:1 “Sazuk nih rial tidai a ngaih bantuk in maw Pathian nangmah cu kan ngai. Maw a nungmi Pathian, nangmah cu tihal in kan hal.” Kan nunnak ah hlawh a tlingmi, ram ttha ah um in zeihmanh chambaunak ngeih lo lio, Khrihfa biaknak ah pumpek le i zuam, dinfel tuk lio ah Salm catialtu nih Pathian a hlamnak kan rak rel tawnmi hi kan ruat tawn maw?

Pathian hlam lo le ngaihnak um lo in Khrihfa ttha tuk si khawh a rak si ko. Asinain Pathian thlarau kan chung ah a um lo ahcun Pathian hi ngaih le hlam khawh a si lo. Lungretheih, van san lio lawng ah Pathian ngeih lo zong ah pathian hi hlam le uhttanh a si tawn.

Maw Pathian, nangmah cu ka Pathian na si, nangmah cu kan ngai. Ka nunnak nih hin an hlam i ka thlarau nih tihal in an hal; vawlei ro nih ti a duh bantuk khin an duh. (Salm 63:2)

Nan khrihfabu le mi dang sinah thlarau thazang naa lak khawh rih lo le na sin in mi nih thazang an i laak khawh sih lo a si ahcun: Pathian lo in Khrihfa ttha na si ve sual maw? Na chung ah Pathian tello in minit pakhat tel na nunnak na peh kho maw?

PS! Norway ka hawipa hi Pathian a duh tukmi a si i ka len lio ah kan i ruahmi kan hrawmh hna. omvendt

Ref: teirialcatialtu.blogspot.com/

Leave a Reply