PATHIAN NIH AN UMPIMI HI TTHATHNEMNAAK A NGEI HLEI MAW? 1. Jakop cu Pathian nih a umpi caah amah thawngin Pathian a zumlomi Laban nih thluachuah a hmuh. Thluachuah ka hmuh hi Jakop thawngin asi tikha Laban, zumlotu pa, nih a theih. 2. Josef cu Pathian nih a umpi caah Portiphar inchungkhar cu Pathian nih thlua a chuah. Inn le lo ah thluachuah an hmuh hi Josef thawngin asi ti kha Potiphar nih tehte a khan.

3. Moses cu Pathian nih a umpi caah khuaruahharnaak phunphun tuah khawhnaak a peek i a miphun kha sal chung in a luat ter hna. Pathian nih a umpi caah Israel mipi kha kum 40 chung a hruai khawh hna. 4. Joshua cu Patian nih a umpi caah ral a tei. Pathian nih Israelmi hna peek ding ah ai timhmi Kanaan ram cu a laak khawh.

5. Samson cu Pathian nih a umpi chung cu ral nih an tei kho lo. Sahrang nih an tei kho lo. Superman ah ai cang. 6. Peter cu Pathian nih a umpi caah voi khat phung a chim ah minung 3000 an piangthar. 7. Jesuh cung ah Pathian Thlarau nih a umpi caah sal ah a taangmi a kan luat ter. Sifaakmi hna nih thawngttha an theih. Khamhnaak kan hmu.

Nangteh: (a) Pathian nih a ka umpi ve na ti i nangmah hmang in na inchungkhar nih thluachuah an hmuhmi a um hlei maw? Pathian nih an umpi le maw, nu le pa phaisa hal le nu le pa hrocer lawngte na rianh rih? (b) Pathian nih a ka umpi na ti i na innpa nih nangmah thawngin thluachuah an hmuhmi a um maw? Pathian nih an umpi i maw, innpa he buai lawngte na rianh rih? Cucuc maw, nang Pathian nih an umpi ning asi?

(c) Pathian Thiang Thlarau nih a ka umpi na ti i maw, zei dang thil ttha tu tuah kho ttung lo in, phone lawngte cu na deh? Phone lawngte deh peng hi maw Pathian sunaparnaak ahcun na ruah? (d) Pathian tthawnnaak nih a ka umpi na ti i maw, thil ttha lianngan tu tuah lo in, nangmah diriamnaak ca men ah biakin chung ahcun phihlik thla kiakmi bantukin nai ziit len. Cucu midang caah tthathnemnaak a um maw?

(e) Pathian nih a ka umpi na ti i maw, thil lianngan tu tuah lo in Khrihfabu nih a herhlomi holhtheihlo hla cu na lih in na phuah i na rock ter hna? Hihi maw thil ttha lianngan cem ah na rel? Khrihfa kalning tu na pial ter ko lo maw? Hihi maw tthawn cem ah na rel? (f) Pathian nih a kan umpi na ti i maw, thil ttha dang tu tuah kho ttung loin na lih in bia na phuan i zeitik hmanh ah na biaphuan zong cu a tlam a tlin hlei bal lo? A ra lai dingmi kong ruahnaak i hei chim khi maw Pathian nih an umpinaak a chan cu asi ko rua hnga?

Pathian nih a kan umpi cu Pathian tthawnnaak kan ngeih nakhnga caah asi. Kanmah nih kan tuah khawh lomi thil lianngan tuah khawhnaak hnga caah asi. Mi dang caah thluachauh kan si nakhnga caah asi. Kanmah pumpaak i nuamnaak menmen caah asi lo. Pathian nih a ka umpi na ti. An umpi ahcun thil lianngan pakhat tal cu an tuah ter ding asi. Zeidah an tuah ter? Phaisa tampi a ngeimi hmanh nih thil lianngan tampi kha an tuah tawn.

A tthawngmi Pathian nih an umpi i zeihmanh ka tuah kho lo ti cu sullam a ngei lomi thil asi. Pathian nih a ka umpi na ti i zei thil hmanh na tuah khawh hlei lo ahcun Pathian tthawnnaak nih an umpimi hi aherhnaak a um hnga lo. Pathian nih a ka umpi na timi hi thil ttha tuahkhawhnaak caah na hman khawh lo ahcun Pathian nih an umpi lo caah asi lai. Pathian nih a ka umpi na timi hi na lih asi caah a si lai. Dr. Aung Myint Thang