Pasalṭha Mirang Ralkap Kum (4)A Rak Ṭuanmi Pu Khuan Kian Kum (103) Nih Mual A Kan Liam Taak Ruangmang Cang Ee

Chin News

Mirang ralkap zong kum(4) chung a ṭuan bal mi le Pathian salṭha a simi Pu Khua Kian nih hi vawlei nunnak in a kan liam tak cang tiah kan theih. Pu Khua Kian hi David Van Bik he zong can saupi Pathian rian a ṭuan ti mi a si lawng si loin Pathian rian a ṭuan chung ah Pathian thawnnak biatak tein a lang, mizaw, mitcaw le hnacheh tiang in a dam ter tu hna a rak si.

Pu Khua Kian hi Vawlei ralpi pahnihnak (World War-II) lio ah miring Ralkap kum(4) bak te a rak ṭuanmi a si i mifel a si ruang ah Mirang ralkap zong nih an rak duh mi, an dawt ngai ngai mi a si. Pathian nih a dawt i changtlung tiang nunnak thaw a pek hnu ah nizaan deilei ah khan hi vawlei nunnak in Pathian nih a lak cang hi a si

  • Min – Pu. Khua Kian
    Chuahkum – 1917
    Thihni – 20/05/2020
    Kum – 103

Chuahnak – Rulbu khua si i miring ralkap aa dinh hnu ah Ralpel khua ah nupi ngei in can saupi an um hnu ah 1970 kum ah Vanzang khuabawi nih Vanzangkhua um dingin a va lak hna. Vanzang khua ah kum tampi an um hnu ah 2006 ah Kalaymyo khua ah afale he an i ṭhial than i Kalaymyo khua ah pathian sin ah a dinh hi si, Pathian riantuan ai thoknak hmasabik cu, Falampeng Thlaisun area ah an rak thlah mi a si. Amah hi Baptist krihfabu ah nihin ni tiang fek tein a ummi a si. Pu Khua Kian a nulepa hi an thih tiang Laiphung Biaknak in a kal mi an si.

A Kong Lamtawi: Pu Khua Kian hi tuchin, fapar tiang a hmu mi si. A tu chin fapar an dihlak (69) an si. Pu Khua kian hi Rulbu khua ah a chuak mi asi. A nu le pa hi an thih tiang laiphung in a um mi an si. A nu le a pa zumhnak duh loin sianginn kai nak ah Pathian kong thei in khrihfa ah arak lut. Cu hnucun a nu le pa laiphung in raithawinak zu le saa ei duh ti lo. Cu hnu cun a nu le pa chuah tak in Pathianrian tuan ai thawk i Thantlang peng Ralpel khua ah nupi a ngei. Pu Khua Kian cu a hngakchiat lio in Pathian nih a dawt i zawtfah nak tha lo a ngei bel lo 2020 ah a mah cu a thawng ngai i Pathian bia zong a chim kho rih.

  1. A Rian Ṭuannak
    1932 – 1936 – Falam peng Laizo khua ah tangli a awng
    1937 – 1941 – World War II lio ah Mirangralkap cazi a ṭuan.
    1948 – Pathian rian tuan ai thawk
    1959 – Maicam hun ai thawk (cu Maicam ah cun kebai, mitcaw, mizeng, thinghmui, mitlu, mi phar, a molh mi, an dam i a holh kho lo mi tiang an rak holh kho) Khengpi ngan pi chung ah ti a chiah i thla a cam i mah ti cu an din i an rak dam. Pu Khua Kian Pathian rian a rak ṭuan lio ah vawlei hmunkip in Pathian rianṭuantu minthang le a rak laar mi hna cu, Mizo ram in Lalbiak Thang, Manipur in Mang Thiang, Rizon khua (Rizon khua ti hi amah ṭial ning a si) in Khen Mang, lakher in Tuan Kam, America in Billy Graham, kawlram in Aung Hlah, Laitlang in Khua Kian. Mah hna he hin Pathian rian kan rak ṭuan lio chan le can a rak i lo, Mah hi rian kan ṭuan lio hna ah hin a lamkip in harnak hi kan rak tawng cio hna.

Note: Pu Kuan Kian a kong lam hi a mah nih a Diary ah aa chiah mi chung in, a tawinak tein a chungkhar nih an kan pek mi a si. Pathian salṭha a si lawng si loin miphun caah zumhtlak tein rian a ṭuan mi pasalṭha a si.

Hi thawngpang hi Laikokekjournal nih a ṭialmi kan lakchinmi a si.

Leave a Reply