February 1/2021-i ralkap nih NLD nawlngeihnak kutin rampi uknak an lak ni thawkin nihinni tiangah rampi nih ralkap uknak kan duh lo tiin duhlonak langhter peng a si. Hi duhlonak langhtermi hi nikhat hnu nikhat in mipi lamzawhtu an karh chin lengmang. Cu lawng si loin ralkap nih nawlngeihnak hi an ap-chiahtthan hlan lo mipi nih duhlonak (CDM) hi peh zulh timh.

Hi duhlonak a langhtermi ramchung mipi cawlcanghnak kongah ramleng um mi hna zong nih anmah le tuah khawh ning cio in cawlcangh le i bawmhchanh cio a si. A cunglei kong he pehtlaiin nihin Yangon ah mipi nih duhlonak langhter in lam an kham ding cu phundang ngai te a si pinah palik pawl lunga mit cang.

“Nihin Minikung- Yangon i mipi lamzawhtu hna nih khachuansen a fami pawl cu lam cungah an bungh i mipi an cherter hna. Mah hi lamzawhtu hna nih lam an khamdan phunkhat a si. Nizan tihni ah mawṭaw a rawk tiin lam an kham dih. Tu chun ah khachuan sen cu lam ah bungh in an char. Palik pawl cu an lulawng a lin cang ti a si.”

Relchih: Hriamnam A Ngei Lomi Mipi Nih Ralkap Kan Tei Hna Lai – A Ruang? Kan Bible tuanbia lak ah pa nganbik le pa thawngbik a hohmanh nih an tei kho lomi Goliath teitu cu pa tiatum lo David a si. David nih Goliath teinak dingah hriamnam tha le hriamnam ngan a hman lo. Chai le lung tekep men a si ko. Zeicahtiah teinak cu hriamnam ah a si lo i Pathian kut ah a um ti kha David nih 100 ah 100 a zumh.

Cu ve bantuk cun zei hriamnam hmanh a ngei lomi mipi nih hriamnam tling te a ngeimi rampi ralkap bu hi kan tei hna lai. A si kho lo a timi an um. Nain a si kho tuk. Kan theih bantuk in Kawl ralkap cu an milu sing 5 leng kai an si, Asia ram lak hmanh ah ralkap thazaang a thawng ngaimi an si ve ko. Sinain tutan ah Mipi kan lung aa rual ning zoh tikah tei khawh lonak ding um lo. Mah belte hriamnam ngeimi kan si lo caah kannih kan mi teinak cu kan thazaang le lungrualnak a si.

Mipi Sandah an piah ning, mino hna an cawlcangh ning le zan ah sangkip an cawlcangh ning le an lung a rual ning zoh tikah ralkap an lung a mit cang. Sandah piahmi hna zong a tak cun Thihruai tu tha hmanh an ngei lo nain mi pakhat cio nih siikan an ngeih. Mi bia an ngai dih. Chim tu si nak in tuah tu si an i zuam dih hna.

Cucaah tutan cu ralkap an sung hrimhrim. Kum dang he tahchun ding si lo. Nikhat hnu nikhat mipi lei ah vuanthan an dir. Palik le ralkap zong mipi lei an i mer thluahmah. Ralkap le palik an lung a dong ziahmah. An tha a dih thluahmah. Zei tuah awk theih lo ah biatak in hran le mi tleih in tan an la. A sau an nguh ti lai lo. A tak cun mi tleih le hran kha teinak chuahpi tu a si lo. An sualnak a ngan tertu le an dantatnak a ngan ter chin tu khi a si lehlam.

Tutan cu Pathian hrimhrim kan lei ah a tang. Minung a tingtang in ni 18 leng sandah an piah cang nain a nih cu a tlu i a thi ti le accident an tong i cu zat cu an thi timi a um lo. Thil mak tuk a si. Pathian mi hna aunak in Jericho vanpang pi cu a ni sarihnak ah a cim ko kha. Zumtu hna caah hriamnam cu meithal a si lem lo. Cucaah Kannih kan rian cu David bantuk in Pathian nih zeidah a tuah lai timi tu kha zumhnak he cuanh ding a si. Kan hlawh a tlin hlan le teinak kan hmuh hlan ah lungdongh lo ding a si lai. Pathian kan lei ah a tang. Teinak cu Amah ta a si. Credit: Saya Tluang Ceu Thang