By Salai Lairamthang||05|29 Biangreithlep|2020|| GEORGE Floyd timi kum 46 minak pa cu May 25 ah khan mirang palek pa nih a tlaih hnu ah vawlei ah a thluk i, a hnawngah a khup in a rial hnu ah sizung ah emergency in an phakpi i athi beh. Mah ruangah George Floyd a umnak Minnesota state Minneapolis khua ah palek pawl cu mipi nih sandah an piah hnawh hna i an buai tuk caah khuaci an mui.

George Floyd cu grocery store dawr pakhat ah a kal i, $20 a ttuh a ken i a pek hna caah dawr ngeitu nih palek a auh hna i, an rak tlaihmi a si. George Floyd cu palek pahnih nih an rak tlaih i, cincik in an khih hnu ah an hruai i, palek officer Derek Chauvin nih George Floyd cu a hngawng ah a khup in a rial chih hnu ah, ka thaw ka chuah kho lo” tiah a au. Mah cu video an rak thlah i, social media le news kip ah an thlah i, a hmutu vialte an thin a phawh dih hna. Mah ruangah President Donald Trump nih FBI le Justice Department cu a rannak in hlathlainak tuah dingah nawl a pek hna. Atu hi a tlaitu palek pa cu tazacuai an timh cang.

President Trump le Twitter Buainak

Twitter cu US hrambunh social media pakhat a si. Twitter ah hin upa lungfim, mirum pawl, celebrities pawl le US ramkhel riantuantu hna nih thil an hmuhning le an ruahning kha zalong tein an post le an taar nak social media platform pakhat a si.

President Donald Trump nih cacawn ni hnih ni ah khan twitter ah cakuat bawm in thimfung thlak ttih a nunning, hrokhrawl a fawining le fir a fawinak kong a tial. Mah a tialmi cu Twitter nih a dik le dik lo fact check an tuah i, a dih lomi a si” an ti. President Trump nih Twitter cu cakuat bawm in thimfung thlak hrawkhrawl khawh a si lo nan timi hi cu nan molh tuk bia a si”. tiah a ti hna.

Liberal democrats ruahnak vial zalong tein chim phuannak nawl nan pek hna i, conservative ruahnak vial fact chek nan tuahmi hi nan kan thleidan a si. Zalong tein chimnak nawl kan ngeihmi nan kan phih piak a si caah presdient executive order ka chuah lai i, kan in rengh hna lai” tiah ralrinnak apek hna. 2020 President thimnak ah atu bantuk in censor nan tuah ahcun nan hmuhmi zalonnak tiang nan sung kho tiah ralrinnak a pek hna. A ra dingmi US thimnak ah kan kalpi tawning si loin lih le hrawkhrol in nawnnok nan timh caah vawlei pi nih an in nih hna lai” tiah a ti.

Facebook ngeitu Mark Zuckerberg zong nih Twitter pawl cu a mawh chiat ve hna. ” kan nih cu social media platform kan si caah thil a dik le dik lo biachahnak a tuahtu kan si ding kan si lo. Kan nih cu Twitter he kan policy a khat lo tiah Donald Trum cu Fox News interview ah a dirkamh.

CNN, Washington post le main stream media hna nih Presient Donald Trump cu an soisel tuk caah Twitter in mipi sin ah fianternak a tuah lengmang.

Democratic Party nih hin mah pumpak i thimfung va thlak nakin cakuat bawm in thimfung thlak hi an duh deuh. Mah cu Nancy Polesi zong nih a chim. 2015 thimnak lio ah cakuat bawm in thimfung thlakmi kongah buainak tete a rak um bal.