Pakistan Minung Tthenkhat Twitter Le Facebook Account Kharpiak An Si: Pakistan ralkap biachimtu Maj. Gen. Asif Ghafoor nih cun nizan Pathianni ah khan Pakistan minung tthenkhat an Twitter le Facebook account cu Kashmir buai bainak konglam an post ruangah kharpiak an si,’tiah a chim. Hi ti an Facebook le Twitter kharpiak an sinak ruang cu regional headquarters-ah India minung rianttuantu an um ruangah a si,”tiah a chim fawn.

Nizan ah khan minung pali Twitter account cu India security agency hna nawlnak in kharpiak an sinak cu India official-lei nih thanhnak an tuah ve. A luancia zerh ah khan Pakistan mipi nih an hman mi Twitter account kharpiak an sinak kong cu an chim fawn.

Asif Ghafoor nih cun Twitter-ah “Pakistan mipi nih social media dang dangah Jammu & Kashmir an support-nak an langhtermi cu India nih a duh lo tuk ruangah atu bantukin mi tthenkhat Twitter le Facebook account kharpiak an si,” tiin, hi konglam vialte hi social media hruaitu hna sinah phakpi a si cang,”tiah a chim.

Laimi nih zeibantuk lungput dah kan herh? timi hi van rel chih: Minung poh hi thinlung nih a uk dihmi lawngte kan si. Ahohmanh thinlung leng in a cawlcaang khomi kan um lo. Ka ruah lo piin bia ka chim timi zong khi a dih lo. Cucaah minung kan nunnak ah thinlung hi a biapi tuk mi a si. Thinlung ruahnak tel loin biachim cawlcangh khawh a si lo. Abik in laimi cu miphun hme, mi tlawmte, ram sifaak kan si caah a lam kip in thancho kan herh. Cucaah kan ram thanchonak dingah a pakhatnak kan herhmi cu thinlung put tha ngeih kan herh. Cucu atu lio laimi nih kan haal bikmi a si. Tulio Laimi nih kan herhmi lungput hna cu,

1.khat le khat i cawisan kan herh: Miphun dang kan zoh hna tikah anmah le anmah an i cawi sang dih hna. Tedim, Matu,Falam kan zoh hna tikah anmah miphun leng in miphun dang an cawisang bal lo. Rian tha tuan awk aum zongah anmah miphun an i phuihlam hna, hnaakkar tenh nun an ngei. Kannih laimi Hakha le Thantlang cu kan si lo, kanmah le kanmah kan i rem lo, kan i er hna. Mi tuahmi poh a tha dih in kan hmuh, kanmah tuahmi poh a chia in kan ruah.

Milo ding zong thangthat le cawisan kan i tim lo. Cucaah nihinni tiang laimi mi hawi kan tluh lonak a si. Biaknak lei zong in i cawisaang hna u sih, fimnak lei zongin i cawisaang hna u sih, rumnak lei zong in i cawisaang hna u sih, miphun dang zei an si cio lo. Kanmah le kanmah kan i hman ve a herh. I kal taak hlah u sih, i dawmhtlai hna u sih law, kan ram caah dir hna u sih.

2. kan lai mino pawl sersiam an hau: Tutan kan tuahmi idol zoh tikah kan fanau le laksawng an tinco mi a tlawm tuk. Zeicatiah u le nau hna nih siaherhnak kan ngeih cio hna lo caah a si. Ram chung ram leng laimi hi zat um ko bu ah kawlram phaisa ting 10 hna lawng kan pekmi hna hi cu a poi ngai tiah ka ruah. Hmailei caan cun kan kut samh deuh kan hau. Mi a lo dingmi kan mino pawl hi duhsaknak he sersiam le bawmh i zuam hna u sih. Football a thiammi an si cun cu pa cu thazaang pe u sih,hlasak thiammi si cun hlaphel hna chuah piak hna u sih. Cuti kan tuah si cun kan mino pawl an thangcho lai i kan ram cu chim hau lo a thangcho colh ko lai

3. kan laimi phun chungah thleidannak hloh kan herh: Mirum deuh poh zohcho, sifaak poh zohchuk kan hmang tuk rih. Nikum Hakha ka tlung dawr ah thil cawk ka duh i dawr chung ka lut thilman ka hal hna an bia key a saang tuk, mi zeiah an rel lo. Ka muisam an ka zoh tikah phaisa ngei lo mi ka si an ka theih caah a si. Cu bantuk cu kan miphun lakah a um rih. Zuamnak pakhatkhat tuah caan zongah mirum sifaak thleidannak a um rih.

Mirum chimmi poh a hman dih a tha dih, mi sifaak chimmi poh a palh ah kan chiah dih. Meeting an tuah mirum bia in biachahnak tuah a si. Sifaak pa kaa a cip. Sifaak pa cu meeting a kai ve nain a pum lawng a thu, mi bia a ngaitu ah a cang. Cucaah kan laimi chungah thleidannak tiva a lungmi hi pumpaak cio nih doh kan herh. Cozah nih an ti kho lo tal ah khrihfabu lei nih biatak in kan i cawnpiak a hau. Laimi thanchonak a ka dawntu hi kan sil le kan lam an si lo, kan inn le kan lo zong an si lo, kan thinlung put a si deuh.