Hakha Khuathar, Rawnsang inn a kaang mi kong update: 2021 January 10 zaan suimilaam 11:30PM i inn a kaang hmasa mi hi Hakha Khuathar i 7Star Kedan dawr ngeitu pa i, inn a hlan mi inn a si tiah kan theih. Hi inn kangh ruang ah pawngkam inn, inn hnih zong mei nih a tlaih i an kaang ve. Hi innkangh ruang ah mei aa thoknak inn chung i a ummi pa cu a nunnak a liam tiah theih a si.

Hi kong he pehtlai in inn kangh ruang ah a nunnak liammi pa i a nupi nih, “Zei indah mei hi a hram aa thok ti kan thei lo. Kei le ka fanu te hi Thantlang ah kan kal i kan pa lawng a um. Thantlang in Hakha hi zing suimilaam 3:00 tluk lawng ah kan phan. Cun, kan dawr thil zong tam lak te a kaang,” tiah The Hakha Post ah a chim.

Ngaihchiat a tong mi hna sin ah Chin Ramkulh Hluttaw Speaker Pu Zo Bawi, Minister Pu Pau Lun Min Thang, Minister Pu Sui Thio le Upadi Choh Pu Sonny Thang Cung hna nih tangka fang le a dangdang thilri bawmhnak an va peek hna tiah theih a si. Inn an hlan mi hi Pu Kio Ling inn a si i atu a nunnak a liam mi hi kum 36 upa U Tan Win a si. Credit: The Hakha Post