Social Media Facebook chungah Chinmi tampi a nuamhtertu le mi thinlung a kan hliphlau tertu nungak Sui Bo nih Facebook ah Live i thlah in amah sining harnak a tonnak le Pathian nih a dawtnak, zeitluk in dah Singapore a um chungah harnak le lungretheihnak a tonmi kong mipi sinah a chim.

Amah hi kan theih cio bangin Video tawi tete tuah in mipi hliphlau tertu le nuamhtertu a si. Atu lio cu innchungah ierh lulh cio a si tikah, lungthin tiang khi a nuam lo i lungthin a mui i khuaruah a pit. Cu lioah, mipi a kan nuamhtertu le mipi thinlung cawlcanghtertu pakhat a si. Video tawi a tuahmi tete khi ṭha tein zoh ah cun hlawtnak tampi kan hmuh cio lai tiah ka ruah.

Capo deuh hi a chim tawnmi a si, nain tuzaan ah a thil tonmi tete le zeitluk in dah Singapore a ummi le arak kalmi hna an rak hmuh hna le singapore kalmi nu paoh cu an thianghlim ti lo tiangkhin rak ti tawn an si.

A chimmi cu,”Singapore ummi le kalmi paoh hi a thianghlimmi nan kan ruah. Cuti a kan titu zong hi kanmah Laimi lila nih an kan ti. Nan fale kan si hih. Upa pipi zong nih nan hmuhning a ṭha lo hringhran. Minung pakhat ruangah singapore ummi nu vialte phundang in na kan ruah dih. Mi ṭha an um bangin mi ṭha lo zong an um ve. Minung ciocio kan ikhat dih lo. Cucaah ruahnak ṭhalo hi rak kan hlonh piak uh. Hlawhlang bantukin nan kan ruahmi hi kan celh lo bikmi le kan lungfahnak bik a si.

“Nan fale nih santlai kan tlai lo nain, thla nan kan campiak i kan ilawm tuk. Hi hnu ahcun kha bantuk bia ṭha loin rak kan ti ti hlah uh. Zeitindah ka rianṭuanmi hi kan tlamtlinh lai tiin kan izuam sek ve. Kan mit bakin kan hmuh lomi cu chim hna hlah usih. Mikut tang i rian kan ṭuan tikah, aizuarmi ah nan kan ruah dihmi hi hlonh cang hna usih. Kanmah tawk tein kan rianṭuannak ah fel kan izuam i, Pathian sinah thla kan cam ve,”tiah thil sining fiang ngaiin mitthli he a chim.

Laimi cu kanmah mit in kan hmuh lomi kan hna in ka theih menmen mi khi kan izumh sual tawn. Kanmah bak nih kan hmuhmi, kan mit in kan va hmuhmi cu va sisehlaw phundang deuh a si. Cu si loin, midang nih an chimmi khi kan izumh tuk tawn.

Tutan ah kan farnu Sui Sui ‘Sui Bo’ nih harsatnak a tonmi kong a von chimmi cu upat awk tlak taktak hi a si. Nusal taktak a si. Holh pakhat thiam loin singapore ah a phan i, cu lioah harsatnak a tong. A hnar thi hna a rak chuak peng. Sinain Pathian aa bochannak thawngin damnak a hmuh. A chimmi video a tangleiah kan chiah i tling deuh ngai cio hna usih. Singapore a kalmi kan far le hi zeitluk ind ah rak temtuar ti hi philh hna hlah usih. Kan ruahmi bantuk an si lo.

An kal duh tuk ruangah a kalmi an si hlei lo, chungkhar zawnruahnak he a kalmi hi a tam deuh cu an si hna. Cucaah an konglam sining ningcang loin chim loin, thlacamnak tu in bawm cang hna usih. VIDEO timi hi hmeh piak law a video zoh khawh a si lai.