Min Aung Hlaing Biaceih A Si Hlanlo, Dohthlennak A Dih Lailo: NUG Defense Minister SAC lutlai Min Aung Hlaing biaceih le hmalaknak tuah a si hlanlo dohthlennak hi kan hgol lai lo tiah NUG Defense Minister U Yee Mon nih amah pumpak Facebook cahmai ah a langhter. 88 lio Siangngakchia hruaitu U Jimmy le NLD palai hlun U Phyo Zeya Thaw, Ko Hla Myo Aung, Ko Aung Thura Zaw hna cu SAC ralkap nih thih dan kan pek cang hna tiah an thanh hnu ah NUG Defense Minister nih atu bantuk hin a langhter hi a si. Min Aung Hlaing kan thahkhawh hlanlo hi dohthlennak hi kan ma lailo i zaamnak hmun ngei loin kan dawi lai tiah ati.

Thawngdang Hniarlawn Mino “Salai Mang Lian Sang” SAC Ralhrang nih an Kah! Nihin July 25, zinglei sml. 11:00 hrawng ah SAC ralhrang nih Hniarlawn khuachung ah Salai Mang Lian Sang (kum 22) cu meithal in an kah caah a nunnak a liam, tiah khua upa sin in thawngpang kan theih.

Hniarlawn khua upa pakhat nih, “Ralkap pawl an rak rat ah khan mucu siangngakchia pawl ka vung la hna lai a ti i motorcycle in a kal. A kalnak lampi ah ralkap he an i tong i an kah,” tiah The Chin Journal ah a chim. Salai Mang Lian Sang hi Hniarlawn khua ah an i bochanmi mino pakhat a si i, Hniarlawn Khrihfabu ah darvuan rian a ttuan liomi zong a si.

A ruak hi khuami nih an lak khawh cang. Hakha in SAC ralhrang pawl Hniarlawn khua an panh caah khuami tampi ram lak ah an zaam bang in acheukhat a zaam lomi zong an um ve, tiah a cunglei upa nih a chim chap. Credit: The Chin Journal

Thawngpang dang: Thihdan Pekmi Minung 4 SAC Ralhrang nih Insein Thonginn ah an Thah Hna! SAC ralhrang nih thihdan an pekmi hna U Phyo Zayar Thaw, Ko Jimmy, Ko Hlah Myo Aung le Ko Aung Thura Zaw cu upadi ning in dan kan tat cang hna, tiah SAC ralhrang nih nihin July 15 chuak Myanmar Alin thawngzamhnak cahmai no. 26 ah thawngthanhnak an tuah.

“Insein thonginn ah an tthial hna i July 23 ah an thah hna,” tiah Myanmar Now nih a ttial. An chungkhar le nih July 22 ah an vung ton hna i July 23 ah an thah hna, tiah Khit Thit Media nih a ttial ve. Asinain, zeitindah SAC ralhrang nih an thah hna timi fiang in theih a si lo. A tang deuh hmanthlak i minung pahnih hi Ko Hlah Myo Aung le Ko Aung Thura Zaw an si i, SAC ralhrang thawngpetu (Dalan) thah ruang ah Yangon ah an rak tlaihmi hna an si.