Nu ralṭha Pi Zonunthari kum (50) nih a pasal kum (59) Vompi nih a seh i a khamh khawh

Thawngpang

Mizoram Mamit District Kawrthah khua pawng K.Sarali khua ah ummi Pi Zonunthari kum (50) nih a pasal Pu Bhriso kum (59) cu vom lakin a nunnak a khamh khawh or a chanh khawh tiah theih a si. Uar a um kho taktak.

Pu Bhriso le Pi Zonunthar hna nupa cu lo an kal pah in tiva an kal pah i lampi ah Vom sum 6 hrawng a si lai cucu anmah lei panh cun a rak ra i Pu Bhriso cu a zuan hnawh colh. Pu Bhriso nih cun namte i put in a sawh chih ve. Asinain, vom nih cun cawl kho loin a tlaih i a lu le hmai hrawng a ṭhuat len ve.

Cuti i Vompi nih anmah Pu Bhriso a ṭhuat len ko cu a lang par in Pi Zonunthari nih cun a hmuh ve. Pi Zonunthari le an pa umnak hi pe 30 hrawng in a hlat i Pi Zonunthari cu rianran cun a rak tli ve i Vompi cu a hnulei ah namte in a rak zuan hnawh chih ve.

Voi 20 hrawng a hnulei ah a sawh hnuah Vompi nih lamtlang leiah a zaam tak hna ti a si. Pi Zonunthari nih rianran cun an pa hliamhma pawl cu puan tein a tuam piak i inn lei ah tlunpi colh. Vom nih a sehnak a hnar le a mit kam cu an umnak khua Kawrthah sizung nih an ṭhit piak khawh lo ruangah Aizawl Pituh sizung ah tlikpi colh a si i Aizawl Pituh sizung nih an ṭhit piak khawh tiah theih a si.

March 8 ah an hliamhma an ṭhitnak pawl cu an phoih piak i atu cu hliamhma a tuarmi Pu Bhriso zong a dam ṭha ngai cang ti a si. Hi thil hi February 18 ah a cangmi thil asinain an pa a dam deuh hnu tuni March 19 lawngah vompi chungin anmah nunnak a khamhtu Pi Zonunthari cu media lei nih tonnak an ngeih hnuah a ceo ah a konglam an von taar khawhnak hi a si.

Leave a Reply