NU LE VA SINAK CU KAN TUAKTAN AWK A SI

Nu le va i nuamhnak hi a biapi tuk hringhranmi thil a si caah kan tuaktan i thilthar tete zong kan hman tti , kan kawl tti awk a si. Tahcunhnak ah tlawmpal in ka van langhter lai.

Nu le va cheukhat cu pakhat le pakhat tha i pek duh ah an i hmet, an i zuunmuai tawn. An keengzaang hna an i hnur , an i tuai piak. Mirang cheukhat cu an fale um lo karah mei an hmih in meilul ( phazawngdan ) van buin inn ah caan ttha an hmang. A cheukhat nu le va cu zanlei nitlak lai ah zalam an leng tti lungduh bia an phai hna. Ka chim duhmi cu nu le va sinak hi voikhat lungthawh i rianrang tuk tuahmi nakin a hlankan tein chun ah maw asiloah zanlei ah maw, chimh chawnh hnu ah timh ciammam tein tuah hi a ttha bik. Cheu khat pasal le cu mah lung duhnak lawng ruat in tuah hmangmi an um ttheo . Hi bantuk cu nu caah a nuamhnak a um lo hlei ah pakhat le pakhat kar lakah dawtnak hri a rak dorhter khawh.

Voikhat cu “Kan Director pa Hotel meeting tuah ah an kan auh,” tiin kan pa kha phone in ka hlen. Hotel kan phak tikah kan hawile cu an rak um lo. Kan pa he nuam tein caan hmanttinak ding caah keimah nih ka rak timhtuahmi tu kha a theih tthan tikah ai lawm tuk hringhran. Nihin tiang hi a chim ttheo.
Voikhat zong nauno he kan si peng caah nu le va sinak caan hi kan ngei kho tuk lo. Kan pa cu zanlei suimilam 3 hrawngah rak ttin te law pakhat khat kan ei tti lai, tiah mobie phone in ca ka kuat. Inn a rak phak lai te ah kan sinumnu kha ka fale he kan innpa ah va leng dingin ka chimh hna. Kan innpa hna zong ttha tein ka chimh chih hna. Kan pa cu inn a rak phak tikah kutka hram ah Nu hni a hmuh, inn ka chung a hung luh ah Nu angki a hmuh. Ihnak khaan lei innka ah nu bawli le bawngbi chunghnawh a hmuh tthan. Innka cu a van on tikah cun banhla hawngkheh cia bang, ready bak i a rak ummi a duh tukmi thil, a van hmuh tikah a celh in a celh lo ve bak ko. Ai sur dih ko cu haaaa.

Cun a biapi tukmi pakhat cu Mobile phone te hna in cakuat le chonhbiak hna hi theih lo kar in nu le va kar lakah dawtnak hram a rak sih. Darling , kan duh tuk. Kan uar tuk. Kan ngai i kan hlam tuk fawn. Kan caah rainhrang na ttuan caah kai lawm tuk, Na rak ttin i na ka hnamh (kiss) te ding ka ruah ah ka hngak kho ti lo, Cun tuzan cu special caan kan hman te ding ka ruah ah, Ka thi kai ka mithlam in ka van suai ah a um zia ka thim ti lo.

Ka pa nih hibantuk in ka ngaihning le ka hlamning a theih hnu ahcun tuan tein inn ah a rak ttin tawn. Pasal le caah timhtuah ding phun khat a si rihmi cu , mithlan khawhnak ding zongin thil kan i hruk aih ding a si. A bikin ihkhun cung te hna ahcun hlawhlang bantukin kan um awk a si. Pasal le nih hal lawng ah rak pek si loin nu zong nih timhtuah cia tein rak dongtu le cohlangtu kan si a herh. Harsa ngai le pakhat duhnak lawngin tuah cu nu la va sinak man ngei tluk in a sung lawi kho lo.

Nupi le nihcun kan i thianhhlim le zoh dawh tein kan um ding zong a rak biapi tuk fawn. I filhhnawm tuk in um le voihvoih hna ah thang tuk in voih heiti bantuk, cun kholh hna huam tuk lo ahcun kan pasal le nih aa dawh deuhmi nungak asiloah nungak dang sinah thinlung le mitzuan a fawi te. Nan pahnih karah taksa diriamhnak a um ahcun a dang chungkhar nuamnak cu duh sah tein a rak ra ko lai. Vaurawngpar Chirhchan: “Pastor Nupi Ka Si” timi cauk chung in lak thanmi a si.