Hi zawtnak ruang ah a tu tiang ah hin US ramchung lawng bak ah minung 6,000 paoh cu an thi cang. New York City a linhsat biknak hmun a si. Hi khuapi chung lawng bak ah hin minung 1,562 bak an thi cang tiah Johns Hopkins University nih an thanh.

Hi kong he pehtlai in The White House nih American mipi sin ah ralrin an peek cang hna. Hi zawtnak a karh ti nak hnga lo mizei paoh nih hmaihuhnak nan i vuah dih lai tiah an thanh. President Donald Trump tu nih cun hihi cu tuah hrimhrim uh tiah mipi sin ah kan thanhmi a si lem lo. Mipi nih hruk an duh ah cun an i hruk khawhmi a si thiam ko tiah a chim.

US Centers for Disease Control (CDC) le World Health Organization (WHO) hna nih hi virus dohnak caah hin a herhmi le thil biapi a simi pakhat cu hmaikhuh i khuh hi a si tiah an chim. Covid-19 hi khuh khuhnak le hathio nak in i chawnh khawh a si timi cu fiangte in an chim. A sinain zeitluk thlat in dah um a herh timi bel cu fiang in chim khawhmi a um lem rih lo.

WHO nih an chimmi cu hmaikhuh sawsawh hi cu ralringte in kut i ttawl le mipi he ai hlatnak hmun i um he i bawmh a herhmi a si. Cun a ngan a dam komi caah cun a herh tukmi a si lem lo tiah an chim chih. A sinain cacawn nilini ah khan New York mayor Bill de Blasio nih New York mipi hna cu leng nan chuah paoh ah nan hmai nan i khuh dih lai, tiah a cah hna.

Coronavirus kong ah President Trump ruahnak petu pakhat a simi Dr Deborah Birx nih cun mipi nih hmaihuh sawsawh in i huh kong ah ralrin a peek. A chimmi cu mipi nih ruahnak sawsawh in sermi thilri sawsawh hna hmang in ran i runven cu a herhmi a si lo. Hihi cu an chapchin sawsawhmi a si tiah a chim chih.

US states a tam deuh dihlak ngawt in inn ah um viar u tiah order an chuah. American mipi 75% nak tamdeuh cu lockdown an si ve cang. Johns Hopkins University nih minung million pakhat nak tam nih coronavirus an ngeih cang. Minung 53,000 hrawng nih an thihpi cang i minung 210,000 renglo damh an si tthan cang tiah an chim. Ref: BBC