Min Aung Hlaing hruaimi Kawl ralkap nih rampi uknak hramhram in an chuh mi kong ah le rampi hruaitu President U Win Myint- Daw Aung San Suu Kyi telh in a dang Cozah upa an tliah mi vialte hna kong ah NLD Party nih official tein UNO sin ah bomh halnak forhfialnak cakuat nihin zaanlei ah a tial ve cang.

NLD Party nih UN sin ah a tlangpi in thil pathum tutan an hal. Pakhatnak ah an hal mi hna cu “Ralkap nih hramhram in an tlaih mi hna. President Win Myint- Daw Aung San Suu Kyi le a dang ramkhel upa NLD upa le tutan ah tlaih a tong mi hruaitu vialte a rannak in luatnak pek an si khawhnak ding ah UN le UN ah aa tel mi ram dihlak nih kan bawm hram uh ti asi.

Pahnihnak: “Kum 2008 phunghram kalh in le phung ning loin hramhram in Kawlram uknak a la tu hriamnam thazaang i bochan in ram mipi nawlngeihnak a chuh tu Kawl ralkap he UN le UN ah aa tel mi ram vialte nih rianttuan hram hlah uh. Kawl ralkap ser mi Cozah hi theih pinak tuah hna hlah uh. Kawlram mipi sin ah nawlngeihnak a phaktthan colh khawhnak ding ah a rannak in kan bawm hram uh tiah an langhter.

Kawl ralkap nih hramhram in uknak an laknak a ruang an langhter mi vialte a dik lomi a sinak le Ralkap thiltuaha tha lomi Rampi election result Ralkap nih an cohlan lonak kong a bik in atu buainak a chuahnak a ruang vialte an langhter dih hmasa hnu ah UN sin ah bomh halnak le forhfialnak zong an tuah chih hi asi.

pathumnak ah an langhter rih mi cu “Kawlram cu ralkap uknak taang ah kum zabu sautuk a um i sifahnak- rawhnak le fahnak in a khat. Kum 2010 in Myanmar rampi cu Democracy lei ah karhlan a si, cu karlak ahcun Nuhrin Covo lei Sipuaizi lei minung cawlcangh le thutdir nak zong ah tampi tthanchonak aum.

A si nain a tuahcun Kawl ralkap nih hriamnam, Meithal i bochan in hramhram in uknak an lak i ram mipi mui lakah a chiah cang, cu caah Mipi nawlngeihnak, Democracy le Nuhrin Covo zalennak a um tthan khawhnak ding ah UN le UN ram vialte nih nan thazaang nan thil ti khawhnak dihlak chuah in kan bawm hram uh, ralkap kut nih an kan chuh mi Democracy hi kan lak piak tthan uh tiah nawlpatnak an tuah hi asi. L.K.J

Relchih: Trump nih Jerusalem cu Israel khualipi a si tiah fehternak ah US am embassy cu Jerusalem ah aa tthial ko i, aho nih an holh ngam lo. Bush nih UN resolution loin Iraq a phawmh i ahodah nih an holh ngam lo.

Obama nih Pakistan ram ah Osama Bin Laden cu a va thah mei ko. Aho nih an kham kho lo. Trump nih Iran general Top, Saleimani cu Iraq ram ah a thah ko. Aho nih an cu-kha ngam lo. Cucaah US nih Myanmar Military Coup ah hmalak an duh tak ahcun UN le N lo a biapi tuk lo. An duh ahcun Min Aung Hlaing hi a inn ah an va tlaih ko lai i, IJC ah taza an cuai ko lai.

Cucaah. US congress nih Myanmar Coup hrawhnak Bill, congress ah an chuahpi lai tiah thawngpang a chuah tikah an chuahpi tak ahcun US khuasa Laimi le Kawlram mi dihlak nan biapi taktak. Nan umnak State ah Congressmen paoh kha email kua cio hram u! An mail boxes ah Kawlram kong lawngte lut seh.

US nih Kawlram kong hi biapi ah a chiah ahcun Europe le Canada tbk vialte nih an dirhkamh ko lai. US nih biapi ah a chiah lo ahcun Russia le China nih teinak an hmuh lai tinak a si i, Ralkap pawl nun Khua saunak a si lai. Cucaah US hi biapi taktak an si ko. Mahle ti khawh ning cio in colcanh a herh lio caan te a si. By Zasang Cinzah