Hi bantuk hi a caan ahcun a herhnak zong a um ko. Sanmyo, Kalay Harmon Tlang Thlacamnak ah kan nu le minung (9) hna cu tukum myanmar rampi thimnak ah NLD nih teinak an hmuh i ram le miphun caah dingfel tein le dawtak tein rian an ṭuan khawhnak lai zan (40) riak bakin thla an cam tiah Rev. Thang Hre nih amah pumpak Facebook ah a tarlanghmi kan hmuh.

Rev. Thang Hre nih a ṭialmi,“Sanmyo, kalay Harmon tlang thlacam nak ah,kan nu le (9) nih ,tukum thim nak ah NLD nih tei nak an hmuh i,ram le miphun caah dingfel te le dawtnak tein rian an ttuan khawh nak lai zan (40) riak bak in thla an cam,Bawipa nih thluachuah pe seh law kan ram dam hraam seh,”tiah a tarlangh.

Cu ti i a Facebook ah a tarlanghmi cu mi tampi kan pale cheukhat tiang nih comment an hei pek lulh cio hna. Mi tampi nih cun a ṭha tuk tiin Amen a pe mi zong an um i, Amen a pek loin a soiselmi zong an rak um ve. Teinak an va hmuh le hmuh lo cu um rih seh, zan (40) rori bak thlacamnak an ngeihmi hrimhrim hi a sunglawi tuk hringhran.

Rev. Thang Hre nih a tanglei comment ah zeiruangah dah a post timi fianternak tawite hitihin a tuah,“Ka vun post duh bik mi cu , thla an cam ti kha asi ,zei party ahman i anih party cu apalh ti duh nak asi lo,lai mi khrihfa kan si caah zei thil kan tuah poh ah Pathian bochan in tuah uh sih ti kha ka langh ter duh bik asi,” tiah comment in fianternak a tuah.

Cun, a tangleiah kan nule minung (9) zan (40) thlacamnak a ngeih cangmi hna nih zei bantuk program dah an ngeih ṭhan timi a chim ṭhanmi cu,“Zan 30 peh rih an ni tim ee, adih lak zan 70 cam an ni tim,” tiah comment in fianternak a tuah chap. Cu lawng hmanh si loin a chim chap rihmi cu,“Halkha ah cun thlacam tu kan nu le pawl tukum i thim nak in ram adam nak hnga zan (100) bak ariak in thla an cam, ka lawmh pi tuk hna,” tiah comment ah a ṭial rih.

Note: Hihi Rev.Thang Hre nih fianternak a tuahnak he kan khomhsuatmi a si.