1. CNLD a tanh tu hi 70% cu ramleng um Chinmi an si. Ramleng in cun Facebook ah au sawh lawng a si i vote an thlak khawh lo caah zeihmanh khi a phi chuak um kho lo. Facebook in mipi kan soi lem hna an ti nain comment le poat ah CNLD a tanh ve lomi poh mihrut phun le miphun daw lo phun ah an rel hna caah mipi soi lem cu chim lo mi tu an thin an hun ter hna.

2. Ram chung khuate tam deuh cu NLD lawng te an si. Chung khar ah nuleva hi NLD deuh lawng te an si. CNLD hi cu khuate ah nungak tlangval pakua hra hrawng lawng khi an um hna. Cu ruang ah vote van thlak taktak a si te lai i NLD nih teinak a hmuh te ko lai. Cu caah CNLD nihcun sungh cia ah a tu tein i ruah ding a si ko.

3. Ramleng lei in CNLD campaigner tete bia chim thiam lo ruang ahhin nan sunghnak ding cu a si. CNLD policy fiang tein tial kho lem tung lo, 2008 phunghrampi a lengphaw hmanh a hmu bal rih lomi tete mihrut campaigner tamtuk nan i ngeih hna caah a si.

4. Cun, CNLD nih kum 5 chung ah nan tuah khawh lo ding mi federal kong nan aupi mi hi zumh awk tlak nan si lonak a si. Ho poh nih hihi cu kan theih dih mi a si ko. Cozah hei tlai hmanh ulaw federal nan lak khawh lo ding mi khi a fiang cia komi federal ram kan ser lai nan ti peng rih mi luakchuak nan sinak a si. Party hi kum 5 caah thim a si. Kum 5 chung lawng party hi zoh nan si cuh. A ho hmanh nih kum 6 ca in an in zoh in kum 10 ca in an in thim hna lai lo. Mi hi a hrut mi ah kan ruat hlah uh.

5. Tulio NLD Candidate tete hi MP hei tling hna sehlaw a tu lio NLD MP pawl nak in eihmuar an thawng deuh lai tiah na ruat bal maw? An mino tete hrim khi zumh awk an tlak bak lo. Minung hi an tuanbia in dawh ai chim khawh pah ko cuh. 6. Suu Kyi nih 2008 phunghrampi lak ah a kalpi mi policy hi a dik mi a si. 2008 phunghram lak ahhin Suu Kyi hmanh hi tluk lawng a cawl kho va si kaw CNLD te hna zei khi an cawl khawh ding a um lo. Thal can ah tiva te ah va kal i Tivate thehrawt le Bantunpaw hna va hrawn luklak lawng khi an tuah khawh ding mi a si.

7. Chinmi nihhin Chinram thanchonak ding caah kum khat caah Chin state budget lawng hi kan i za bak lo. Kum khat ca kan budget ngai hin cun kan si kho deuh lo. Kan i za deuh lo. Cu ruang ah Union budget hi Chinmi nih tampi hman kan herh. Cu union phaisa a hal khotu ding, union phaisa a tomtom in Chinram thanchonak caah a luhter khotu ding cu NLD MP pawl an si cuh. CNLD MP nih Union phaisa an hal tikah bahu hlutraw ah zei pipa ah an rel piak hna lai lo.

8. Mizo nih Pu Zoramthanga an duhnak pakhat cu state budget pin ah Union budget hi pei Mizoram chung ah tamtuk a luh pi khawh cu an ti tawn. Ramkulh budget lawng in thanchonak a si khawh lo caah ram pumpi phaisa a tomtom in Chinram ah a kua khotu NLD party vote pek kan herh rih ko.

Federal kha cu CNLD nih chim ti duh hlah uh. Nan chim hlan in kan theih dih ciomi a si ko. Kawlram ah federal ngah khawh a si lo. Kum 70 leng a luan cang hih. Cucu nan MP pawl nih hlutraw in hei lak ding cu mi theihnak ah nihchuak tuk zong a si. Chinmi nih federal kan duh lo kan ti lo. Kan duh tuk cio. Nain party tanh ruang ah a si kho lo dingmi hlennak biachim kha mi a neng. Cattialtu: Sui Tha Iang