By Salai Lungthli Tum||CNLD phu nih mipi sin a dik lomi ruahchannak pe ti hlah u||Kan ram hruai ning hi presidential a si caah NLD nih president thim khawh ding ah majority MP 333 thengte a herh lo, ralkap nakin MP tam deuh(plurality) a ngeih belte cu a herh. Chim duhmi cu MP 300 hrawng lawng an ngeih zong ah party dang bawmh hal hau loin president an tling kho, a fawi tuk ko.

President thim tikah NLD nih minung pahnih an chuahpi lai, ralkap nih minung pakhat an chuahpi ve lai. Anmah pathum cu Pyidaungsuh Hluttaw ah MP 664 nih mee an thlak hna lai i mee tam bik (plurality) a hmumi minung kha president a si te lai, vote 333 cung a hmuh lawng ah president a tling kho tinak a si bak lo.

Hibantuk caan ah miphun a daw theng lomi MP cheukhat le party cheukhat nih ralkap minung vote an pek khawh hna. Ralkap minung mee a pe taktakmi party zong an um len te lai, nain tlangcung party dihlak an si lai lo, miphun a dawmi party cu mipi hmai an zoh lai caah ralkap minung mee an pek ngam lai lo, mipi nih an party an kaltak ding an tih tuk lai.

Parliamentary system a hmangmi ram lawng ah funkomh cozah (coalition government) hi a si kho, presidential system a hmangmi ram ah cun coalition cozah ser a har ngai, a si kho lo tluk a si.

Aruang cu kan ram president thimnak zong ah absolute majority(50% +1) hi a herh ti lo, plurality lawng a herh. Cozah a nun peng khawhnak ding caah le president phuah a ton lonak ding caah party dang bawmhnak zong a herh ti lo, a tling ciami president phuah duh ah cun MP 66% nih vote pek a hau, cucu a si kho lo.

Parliamentary system a hmangmi ram belte ah cun cozah sernak ding caah MP majority ngeih a herh i cozah a nun peng nak ding caah MP thazaang 50% cung ngeih lengmang a hau fawn. Hi ruang ah NLD party nih cozah sernak ding caah party dang bawmhnak kan herh lo, coalition cozah ser a hau lo an ti lengmang nak a si.

Chim duhmi cu NLD nih tutan thimnak ah MP 333 an ngah khawh lo sual zong ah party dang sin ah tang vai dor len a hau lai lo, zaangfah va nawl len a hau lai lo. ‘Nan ka bawmh ahcun a tha, kai lawm ko lai, nain nan ka bawmh lo zong ah a poi tuk lem lo’ tiah NLD nih ninghngal ngai in a chim khawh.

Cucaah, CNLD phu nih,”NLD kan rengh lai i thim awk an ngei ti lo hnu ah bawmh an kan hal lai, coalition cozah kan serti lai i Chin cozah sernak nawl zong an kan pek ve lai,” tiah mipi sin ruahchannak diklo an pekmi khi mipi hlen phun khat a si, an party ah mifim tampi an um ve ko caah thil sining dik an thei lo cu a si lem lai lo dah!