NLD Lawng Nih 2008 Phunghram A Remh Kho Lai Lo CNLD Lawng Zong Nih Chinmi Federal Hmuh Khawh Nakding Ah A Kalpi Kho Lai Lo Ruah Phu Taktakmi Thil A Si Hih

Hmuhning

NLD Lawng Nih 2008 Phunghram A Remh Kho Lai Lo CNLD Lawng Zong Nih Chinmi Federal Hmuh Khawh Nakding Ah A Kalpi Kho Lai Lo Ruah Phu Taktakmi Thil A Si Hih

1). NLD a ttanh mi nih an chim tawnmi cu 2008 Phunghram a remh khotu cu NLD lawnglawng a si, ti khi a si. NLD nih Kawlram cozah le Parliament a hruainak kum 4 a si cang. Kum 4 hnu tal ahhin cun NLD lawng nih thimnak ah zeitluk in teinak an hmuh zong ah 2008 Phunghram an remh kho lo timi cu, fiang tuk in a lang cang.

2). CNLD a ttanhmi zeimawzat le CNLD hruaitu cheu khat nih le CNLD lawng nih Chinmi nih Federal kan hmuh khawh nakding ah biatak tein a cawlcang lai, ti a si. CNLD cu Kawlram thimnak chungah a lut ve mi le a cawlcang cuahmah liomi party pakhat a si. Cucaah CNLD lawng nih Federal hmuh khawh nakding ah biatak tein an cawlcang lai ti cu, Hakha in Yangon kal nakding ah Gangaw-Mandalay-Yangon lam lawng a um tibantuk khi a si.

3). 2008 Phunghram cu ralkap hnatlaknak tel lo in remh khawh a si lo. 4). Ralkap zong nih anmah lawng in remh khawh a si lo. A ruang cu Parliament ah 100 ah 25 lawng an si. 5). Cucaah 2008 Phunghram cu ralkap, tlangcung hriamtlai phu le Kawlram thimnak chungah a lut i teinak a hmumi party hna thumkomh hnatlaknak lawng in remh khawh a si.

6). Atu tiang ah 2008 Phunghram remh khawh nak lam a ummi cu NCA minthut le 21 Panlong Ceihmainak lawng a si. Asinain cu lam a ummi hmanh cu zeitluk in dah kal a har timi cu atu lio Kawlram thil sining nih tampi a langhter cang. 7). Cucaah NLD ttanhtu nih NLD lawng nih 2008 Phunghram a remh khawh lai timi le CNLD ttanhtu nih CNLD lawng nih Chinmi nih Federal hmuh khawh nakding ah biatak tein an kalpi lai timi hi cu, 2020 thimnak teinak hmuh khawh nakding ah cun aupi lo ah a ttha ngai ding khi a si. Credit: Lian Ding Hmung

Leave a Reply