Cawkhaltu le Tuukhaltu Bianabia in Kachin State Day ah Ramkhel Kong Cawnnak: Kachin Pine Ni Sunlawi Camtuak ah Ram Hruaitu Bia Rolling Cheukhat 1. Geography Ning in derhmi Union timi Pyidaungsu. 2. Pyidaungsu lungput le Thlarau Ngei zungzal ding. 3. Zungzal Dindeih nak caah Meithal tlaih in hmuhco khawh asi lo. 4. Raltei nak le Ral Thazang hmang in Buanco I timh loding. 5. Mahduh mi lawng I lak, duhlo mi cohlan lo mi nih dindeih nak a hnursuan.

Panglong ning in Kawlram komh sernak an hnawn cang ko rua. Panglong Biakam nak a pumpi in an hnawn cang rua. Nawlvo, Tinvo, Covo, tbk vialte tlukruan nak hna kha Innkil lung ah hmang in dirhmi Panglong Ramkawm. Kawl miphun Hruaitu hna le Party hna nih duhin an cohlan khawh hrim lo. Anṭial a lang rua. Miphun pakhat le Party pakhat lawng cungnung cem ah sersiam mi Cozah le Ram, Ideology & philosophy an chim phuan asi cang.

Pyidaungsu lungput le Thlarau timi hi Panglong kaltak tuk kha asi ee. Miphun hna I remh ṭhannak (Reconciliation) le Federal Democracy ram sersiam ding ah Panglong lungput le Thlarau abia pi bik. Cu Thlarau cu ngeih le a nung zungzal aherh. NCA cu Panglong lei kalnak Lamthluan ah Hauka asi. Raldeih ter cicek ding, kahngol ding asi. Cucu NCA anti.

NCA in Federal Democracy lei kalnak lamthluan le Upadi serh, Panglong Thlarau kan nunter ṭhan lai. Ramnuam, Ram ṭhancho, Ramkomh ah kan serchuak lai. Hi hna ruahchan in 21st Panglong Conference tiah min pek nak asi cuh! Panglong Lungput le Thlarau dah tilo cun Tlangcung mi nih cohlan mi aum tilo. Panglong hnawn in Pyiduangsu aum khawh lo. Ramkhel ah rulbang fim in I ralrin ding mi Bia (Pyidaungsu-Panglong Thlarau Tello) asi. Meithal chiah in Remdeih nak tling sersiam ding ahcun Panglong Biakam tlingter hmasa ahau ve. Tlingter khawh lo hmanh ah Amakhan a herh. Federal Pek ahcun zuur tiah ral cu adai phut ding asi.

NLD Cozah Policy ah Panglong Biakam le Federal Amakhan mi pelte hman a um lo. NLD Lamthluan cu Miphun hna I remhṭhan nak, Raldai nak, Democracy ah kal (3) lawng hi abikin an si. 45 Upadi remhtu hna nih an chuahpi mi Pohma 3765 ah Federal aum lo. Federal anti khawh lo hmanh ah Bahu Cozah nawl zawr tertu Pohma 261 tal I tel ve ding asi nain, pohma 261 remhding ah amui adeh fawn lo. 72 kum leng Kawlram Piatana cu Tlangcung mi hna Piatana asi. Miphun remhṭhan nak ah Ralkap he lawng an kalṭi. Tlangcungmi hnu ankan chitdiam ai.

Meithal an tlaih nak achan cu: Federal le Confederation Zauk phung (AA le UWSA Duhmi) an hmuhco lo caah asi. (We have no choice). Hi Zauk phung hna Amakhan mi Policy le Biaruah nak um sehlaw, Ahohmanh fial hau loin Meithal cu an chiah diam hnga mu? Phunghrampi ning in Ralkap cungah Nawl an ngeih khawh lo cu amikip theih asi ko. Negotiation, Counseling le Advocacy roles tuin zalon tein kal khawh asi ve.

Ralkap nih Tlangcung mi hna umnak hmunhma ah vakal in ral va doh lo dingin hlem hnaseh law, Ralcu put tiah a dai ding khi asi ko. Raltei nak le mah duh lawng cohlan timi BIA hi AA a tiduh nak hna asi. AA remh lo ruang ah adang dindeihnak le Federal duhin Cabuai cung Ramkhel biaruah nak ah a ra mi Tlangcung mi Hruaitu hna rolung bunh hi cohlan khawh ahar ngai. Mi Pipa lungput le biachim asilo.

Cawkhaltu: Cawhnu lei in a zulh I fungfek in an tuk den hna. Kal aduh lomi hi hmai lei um mi cawruun an si ko nain Fungtuk a hua mi cu Hnulei bik cawpi le cawrun ansi. Remdeih nak le NCA cohlan tu hna cu NCA le cabuai cung raldoh nak ah ara duh lo mi hna ruang ah voi cikcek in an vuak ko cang hna lo maw? (Anhnu lei ummi an mipi telin) Tuukhaltu: Tu hmai lei ah a kal. Tuurun nih a hnu in an zulh. Sahrang le Ceihngia kha aven piak hna I a ṭhawl piak hna. Tuurun hna duhdim nun ngeih le hnangam lungdeih nak kha aa hmai thlak bikmi asi. Tuurun caah nunpek le luhlo kha a mah lungtho tein ai sian mi asi. Nihin Kan Kawlram hruaitu le Kawl party Lutlai hna cu Cawkhal in an kankhalh cang ko hi.

Hi vialte Hellram in I hlihphuah khawhnak dingah, Ramkhel lawng in asi khawh mi asi caah, Miphun Ramkhel Party a um nak chan hi asi bik. Association le Convention timi Biaknak dirh hmun in chawnbiak khawh asi ve lo cu ta. Miphun party ah lungṭhul loin thazang pek cio hna sih. Dirhkam usih! Bawmh u sih! Kan kut chanh usih! Vote nakin Nawl, Anna & Power pe ve cang usih! Kantum Zauk pennak le Covo kan hmuh dih hlan lo tiang! Kamlo Chuncha bang. Saya Rung Kaw