Salai Lungthli Tum: Nizaan tihni zaantim Yangon ah Japan kal duhmi pawl form lak an i cuhnak video zoh ah khan kum khat kar ah kan ram zeitluk in dah a chiat manh timi hmuh khawh a si, ngaih a chia taktak. Kei nih thil ka tuaktan ning ah cun:

1. NLD cozah nih ralkap kha an ral bantuk in an rak zoh zungzal hna, ram le miphun zawnruahnak in riantuanti an i tim bal theng lo. Uico le meheh an rak lo tawn. Rampi thancho nak kha mah pumpak duhnak lawng kalpi nakin biapi deuh rak chiah cang hna sehlaw ralkap lungthin ah aa-na ting duhnak a rak um men hnga lo.

2. 2020 thimnak ah mee an fir (or) ningcanglo riantuannak a um sual ko zong ah cu mee firnak menmen nih ram a hrawk kho lo, minung nunnak a liamter kho lo. Aa-na ting le mee fir tih an nun ning cuaithlai ahcun aa-na ting cu rampi caah tihnung tuk hringhran timi MAH nih rak tuaktan deuh sehlaw tulio dirhmun hi kan phan hnga lo.

3. Thailand zong ah ralkap nih aa-na an ting, nain rammi an buai lo caah an ram a thangcho deuh lehlam ko. Rammi kan buai ahcun kan ram a rawk dih lai, ralkap nih an tuarmi nakin rammi nih kan tuar ning a fak deuh tuk lai timi reality kha Thailand rammi bantuk in rak cohlang kho cia u sihlaw tulio dirhmun cu kan phan men hnga lo.

4. Myanmar rammi nih a nemnak in aa-na ting kan duh lo tiah lam kan rak zawh lio ah khan meithal in mipi rak that hna hlah, mipi duhnak rak zulh in thutdan rak kaltak colh than ko sehlaw mino ramtang an lut hnga lo, tulio kan ram hmunkip ah kan hmuh lengmangmi rammi pakhat le pakhat i thah timi zong a chuak hnga lo.

5. Aa-na ting hnu in ralkap nih hriamnam ngei lo 2,000 leng an thah cang hna, nain mipi hriamtlai phu nih hriamnam ngeilo 4,000 deng(USDP member le khuabawi an tam bik) an thah ve cang hna. Ralkap lei minung an lungthin ah cun mipi hriamtlai phu hna hi ‘ram hrawktu ralhrang, hriamnam ngeilo an thah lengmang hna’ tiah an chim. Anmah kut in hriamnam ngilo pazeizat dah an thih ve timi an i theihter ti lo. Ralkap zong nih minung hngawng an tan, mipi hriamtlai phu zong nih minung hngawng an tan ve. IS ralhrang zong nih minung hngawng an tan ve tawn. Mah pumpak palhnak i zohfel duh loin midang palhnak lawngte a hmumi hna ruang ah kan ram a rawk chin lengmang.

6. Kan ram sipuazi kan hrawh khawh i ‘failed state’ ah kan tuah khawh ahcun ralkap an lungdong lai i uknak an chiah than ko men lai timi ruahnak hi dohthlennak a tuahtu phu lungthin ah a um, a lamkip in rampi sipuazi hrawh khawh an i zuam. Rampi a sifah tuk tikah ‘ralkap ruang ah a si’ tiah sualphawt nak ding an bawh. Dohthlennak caah a thahnem lai timi ruahchannak an ngei. Nain, a temtuar tu taktak cu rammi kan si — ralkap an lung a dong ko lai i uknak zong an chiah taktak te ko lai timi ruahchannak um taktak sehlaw rammi temtuar zong a phu ngai ko hnga nain.

7. Mino vialte college an kai ti lo, rian ngeilo an karh tuk. An caah ruahchannak a pit. Ramdang kal lawng an caah ruahchannak ngan bik asi cang. MAH phu ruahnak ah cun mino tam tuk ramdang kal an duhmi hi mipi hriamtlai phu nih sianginn kai lo ding, rian chuahtak ding tiah an tlerh hna ruang ah a si tiah an ruah. A diknak zong cu a um ko lai. Nain, mino tam deuh nih MAH cozah cung ah zumhnak an ngei lo ruang ah ramdang kal an i tim cio timi khi MAH phu nih an i fiang lo, an i theihter lo.

‘Nang na palh, keimah lawng ka hman’ timi lungput a ngei i nawlngeihnak lawng uico saruh cuh bang ai cuhmi kan ram hruaitu hna ruang ah tuni mino tampi ramtang an lut i harnak phuntling an tuar, rammi nunnak tam tuk a liam. Hi vialte hi rak hrial khawh tuk a si ko. Kan ram tulio sining zoh tikah knockout in zei phu hmanh nih i tei khawh a si lo, ram buai a sau deuh poah ah kan ram sifah a zual chin ko lai. Kap hnih in pumpak duhnak lawng kalpi i tim ti loin rammi zawnruahnak lungthin he cabuai cung bia i ruahnak lawnglawng hi tulio kan ram temtuarnak in luat khawhnak ding lam tha bik cu asi lai.