NLD Chin Cozah Nih Hakha Hmunthar 676 Acre Samh An Timhmi Kong le Inn le Lo An Hrawhpiakmi Hna Kong Ah Ka Hmuh Ning Chim Ve Tuah Ning

NLDChinCozah: Pakhatnak ah: Kawlpa si dawh si. Cu pa nih inn an hrawh lio video a thlatu (media) pawl… hey..nan nu ka ti lo ti phun in, hman/video thla hlah uh tiah a kutdong in a hei sawh hna i a hei hro/au hnawhmi hna ka hmuh i ka thin a linh in lin. Zakhaine pa nih Chinmi a kan volhpamh bantuk in hlah maw “nga lu ma ta” ka hei ti ve lai ti bak ka lung ah chuak.

Media pawl tel/umter an sianh hna lomi hi cu ka lungtling lo tak tak. NLD Chin cozah hi ralkap cozah bantuk pei an si ve ne ko hi ti a ruatmi an tampi lai. NLD e, Democracy e, zei e ti lenmi cu lohtlau vomcracy pei a si ko hi a timi zong an um ka zumh. Biaceih zung ah a thli in tazacuai ding tal va si rih lo. Zapi theih in thanh i tuah timh ko mi thil thuh hei timh ṭung cu ui fir ai phuhrung ne hlah maw ti phu an si tiah ka ruah.  CM Salai Lian Luai le Pu Zo Bawi tu hna hi a hmun ah kal lo in media pawl nih an thlahmi tu zoh deuh ding an si nain media pawl tu an kham hna i anmah tu an va zoh ve lehlam. Inn hrawh lio an cuanh ve len kha cu ka mit an kem dom.

NLD Chin cozah nih ralṭha ngai in Hakha 676 hmunthar chung i inn le lo sakmi pawl a hrawh i a chuh ngam hna bantuk tein inn hmun hi zapi sin i a phawt/pek ṭhan tikah dingfel tein a pek/phawt hna bak a herh lai. A thlithup le hrokhrol in an pek/phawt le phawt lo hi a dih tiang media le Halkha khuami hna nih hlathlai le ngiat peng hna ding hi a herh taktak lai tiah ka ruah.

Hakha 676 ram chung i inn a sami pawl hi a tamdeuh cu cozah zungṭuanmi siloah, puaisa le pupa ram ngeitu tbt. hna sinin phung ning lo in a cawmi an si hna ti si caah Chin cozah nih hi kong hi a hlathlai ve hrimhrim ding si tiah ka ruah. Abik in, cozah rianṭuanmi nih zungca he an tuah i an cawkter mi hna a si ahcun an cawknak phaisa khirhter i inn le lo saknak i an dihmi vialte zong liamter i dan zong tat ve hna ding an si. A cawtu lawng tuarter lo in phung ninglo in a zuartu zong dantat ve hrimhrim ding an si tiah ka ruah.

InnHrawhPiakmi: Cozah rianṭuantu sinin Hakha ram 676 chung i ram/innhmun a cawmi an um ahcun cu hna nih cun ram/inn hmun an cawknak kong le zeizat dah an pek hna timi kong hi media pawl sinah chim dih hna seh law ti ka duh. Cu ti an chim ngam/duh ahcun anmah palh lawng siloin cozah lei minung palh zong ai tel lai caah zapi (public) nih cozah eihmuar nak kong hi fiangte in theih khawh a si hnga. Cu lo ah cun, zeitluk in Chin cozah nih ningcang lo i thil an tuah zong ah zapi nih tuar peng a si ko lai.

Inn hrawhpiak i hmun an chuhmi hna hi Halkha i inn le lo ngei lo taktak le umnak ngei lo taktak an si ahcun, NLD Chin cozah nih 676 hmunthar hi zapi sin i a pek/phawt ṭhan tikah sawkter ve hna seh law papek (usape) in innhmun hi tinter te ding an si tiah ka ruah.

Chin Cozah Biacah Duhmi: Inn hmun chuh ding le inn hrawh/ṭhehpiak ding a um ṭhan sual ahcun MEDIA pawl umter kha rak kham ti hlah uh. Cerhtual lai ah “MIT I CHIMH I EK EK BANTUK DAWH NAN SI LAI KHAH! Hakha Media pawl cungah kaa lawm taktak. Telter an sianh hna lo nain zapi nih hmuh khawh dingin tlamtling ngai in an kan thlahpiak khawh ṭhiam i lawmh a um taktak. Cozah a felnak ding ah media ai tel hrimhrim a herh. Zaanghlei kan chuahpiak hram ko hna seh. Nikhat khat ahcun cozah tu nih an herh i an hlam tukmi hNa an si caan a um te lai.

Buainak faak tuk um lem lo tein cozah nih inn 130 an hrawh khawhmi cu ngaihchiat awk ngai a si ko bu ah khat lei ruah ahcun i lawmh awk ngai a si ve. A ruang cu, hmun dang ahcun si seh law thisen tiang hmanh a chuak khomi a si. Mi lungnem, uk fawite kan simi a van langhnak zong cu a si pah fawn. Hmailei belte ah, namneh chih lengmang dingmi mi ralchia phun kan si lo ding a bia ngai lai. Ralṭhat a herh caan a um pah tawn te lai. Credit: VC Khenglawt/ Photo Credit: HakhaPost, ChinlandPost