NLD NITLA CAAN A PHAN DENG MAW? PART (1): Mirum le Mi lianngan kan ti mi hna zong mit tthep ah mi sifak an si khoh bangin Mi sifak santlailo kan timi hna zong thaizing ahcun mi lianngan ah an chuak kho ti cu el awk tha lomi vulei cung kalning a si. Ni hin ah Cakei bantuk i kan uar mi NLD party lian nganpi zong hi hmailei ahcun circiik bantuk ah a chuak kho ve bak ko. Kawlram party tampi lak ah zei party dah a hram a fekfuan ti hi ka tuak tawn. Kan uar bak lomi USDP hmanh hi NLD party nak in an hram a thuk a fekfuan deuh tiin ka hmuh. Chim ko ahcun Chin Party CNLD hmanh hi long term ca ahcun NLD nak in a hram a fekfuan deuh lai tiah ka zumh. NLD caah Ni a tla deng cang maw ti kha ka hmuh khoh tawk in van chim ve ka duh. (Atawi nak in)

1. NLD cu Minung Pakhat cungah aa hngat bak mi party a si: A ngaingai ti ko ahcun NLD cu Aung San Suu Kyi pakhat kan zumh i kan i bochan tuk ruangah NLD ah kan dirpi viar khi asi ko. Pi Suu Kyi hi 1988 hlan ahcun ramkhel kongah kan rak thei bal lo. Mipi nih kan uar khunnak zong hi Apa Aung San thawngin asi ti ning law nan ell kho lai lo. Kan Pi hi a tu kum (74) asi cang i a ngan dam ahcun 2025 (kum 80) tiang cu ramkhel a ttuan kho men. Kum 80 leng minung cu hopauh tar-aa lei panh asi ko caah anih zong cu san atlai ti lai lo. Cu hlan zong hmanh ah minung asi ve bantuk in a thi kho mi zong asi. Kan Pi Suu hi hei um ti hlah sehlaw NLD hi 75% cu mipi uarnak a zawr hrimhrim lai tiah ka ruah. 2025 hnu NLD lam hei cuanh ahcun Ni a tla deng cang ko tiah hmuh khoh asi.

2. Pi Suu Kyi Bantuk hruaitu Upa ttha NLD ah an um ti loh: Kawlram huap ramkhel ahcun Aung San Suu Kyi pin ah Mipi nih kan duhmi le kan Uar cemmi cu 88 Generation Upa Min Ko Naing le Ko Ko Kyi ansi. Ko Ko Kyi cu a khua South Okkalapa ah NLD Candidate in election thim dingin a sawk nain NLD Baho nih an duh lo. A lung rak fak ngai. Cun NLD chungum mifim mithiam hna cu party in an chuah mi hna an um bantuk in an mah tein a chuak mi zong an tam tuk cang. 2015 Acozah an ser lio ah zei huaha asi lomi USDP party zongah mee a sungmi Thura Shwe Man, U Aung Ko le U Zaw Htay te pawl cu NLD acozah nih an sawm hna i rian sang pipi an pek hna. Mipi nih an ruah mi cu NLD nih hin Mifim le mithiam an hnawn ko hna lo hlah maw tiah an ruah cio. Ka chim duhmi cu NLD party ah Aung San Suu Kyi chawng khotu ding hruaitu Upa an um lo caah NLD caah Ni A tla Deng Cang tiah ruah khoh asi.

3. Miphun Dawtnak Pupa thinlung (Patriotic spirit) nih Tlangcungmi ram ah NLD thazaang a der ter: Kawlram cu Miphun 135 kan um ti asi (dialect or hills tracts) deuh maw asi ka fiang lo. 2015 hnu ko ah hin Pupa kokek lungthin cu tlangcungmi sin ah a karh tuk. Ka hmuh tawk ah, Tlangcungmi Karen, Shan, Kachin, Kaya,Mon, Rakhine ram ahcun an mah Kokek Party kha an dirkamh viar cang hna. Chinram tu ahcun tuak cio ve ko uh..A zei a vasi hmanh ah NLD zong Tlangcung ram တုိင္းရင္းသားေဒသ ahcun khua hlan bantuk asi ti lai lo. Tlangcungmi Pupa Kokek thinlung ruangah NLD cu a caah Ni a tla deng cang ti khoh asi ko lo maw.

4. MABATA kan ti mi Kawl phunttanh phu ruangah NLD cu a thazaang a der taktak:
Khua hlan NLD a dir kamhtu 30% hrawng cu MABATA phungki ruangah NLD in an i let cang. Mah hi NLD ca zongah thin phang ngaingai asi. Mabata phu a um hi NLD caah Ni a tla deng cang ko lo maw tiah ruah awk a um. (NOTE. Kau deuh in Part 2 ah ka peh tthan te lai)

Biahlei ah: CNLD hi minung pakhat maw pahnih ah aa hngat mi Party asi lo. Khua hlan ahcun CPP cu No Than Kap party kan ti, Pu Zo Zam party kan ti, Pu Ngaisak party tiah khawh tawn a rak si. CNLD cu No Than Kap Party asi lo, Zo Zam party zong asi lo. Chinmi kan party asi. CNLD cu CNLD Chin Party asi peng ko lai. Minung Hruaitu Upa ah aa hngatmi party asi lo. Pupa kokek thin lung (Patriotism) in aa sem mi asi caah a hram a fek a hmun peng lai. (A cunglei catial hi keimah pumpak hmuhmi le ruahnak asi) The philosophy of JACOB R THANG

Credit: JACOB R THANG