Nizaan August 1 zanlei ah Timit hlei tlang lei ah miphun ralkap le SAC ralhrang karlak kahdohnak fak ngaiin a chuak, tiah thawng kan theih. Zaanlei sml. 4:00 hrawng in kahdohnak aa thawk i zaan sml. 7:40 hrawng lawng ah kahdohnak a dai. SAC ralhrang pawl hi Rual-U thlan lei in kal ti loin Nawl lei tu in an kal i Ngaitemang pawng hrawng ah miphun ralkap he kahdohnak a chuah hi a si.

Kahdohnak a chuah hnu tlawmpal ah SAC ralhrang nih Cawbuk lei in bawmtu ralkap bu an thlah chap i, thazaang tam ngaingai in miphun ralkap cu an doh hna. Nizaan kahdohnak ah miphun ralkap lei in a nunnak a liammi an um lo tiah kan theih i, SAC ralhrang lei belte in a thimi le hliam a pumi an um le um lo fiang in theih a si lo. Credit: The Chin Journal

Ca biadang: Pastor, Biakin le Dohthlennak: Tulio kan dohthlennak hi mipi dohthlennak (people’s revolution) asi tiah kan ti khawhnak afeh ter tu cu Pastor te le kan biakin hna hi an si. Ahlan ah cun pastor cheukhat nih biakin ah dohthlennak kong chimlo ding tiah an rak kham. Asinain kan dohmi ral hi kan biaknak zong a hrawk cuahmah tu, kan nunphung le kan sining vialte a kan hrawk tu an si timi kha tutan ralhrang hna cawlcangh ah hin fiang tuk in a ahung lang.

Chin ram ah biakin 50 renglo an khangh cang in adang tampi an hrawh. Kan pastor te biatak te in hi dohthlennak ah an hung ttang I kan biakin hna cu thil ttha le thil chia (good and evil) ttha, adik mi le adik lo mi fiangte in thleidan nak hmun ah an hung cang i thil ttha lei ah fektthup in an hung dir. Tulio ah kan ram dohthlennak ah hmunlipi asi mi Camp Victoria ah kan pastor te le kan biaknak lei kan pa le vialte a phan lo mi an um lo ti awk tluk tiang in dohthlennak ah kan pastor te an ttang.

Kan pastor te le kan biakin hna nih dohthlennak hi an dirkamh caah kan dohthlennak cu ahlawh atling mi mipi dohthlen nak asi tiah fiangte in kan ti khawh. Zeica tiah Chin State khua 1300 ah biakin a um lo nak khua a um lo. Kan khuapi hna I sang le veng kip ah biakin a um lo nak a um lo. Khoika poh ah Chin miphun minung 20-30 kan um nak ah biakin kan ser, kan ipum dih.

Hmanthlak; Camp Victoria ah biaknak lei kan pa le asi mi hna Rev. Dr. Chum Awi le Rev. Dr. Hla Aung an rak kan tlawng I kan pastor Rev. Tluang Hre le kan kharihfa upa Bawino (Lieutenant) Maimai nih bia an ruah lio hna asi. Kan Kharihfa upa Lt. Maimai ( nungak bo hnih nu) hi Degree a lak hnu ah Chin State leng in CNA ah a rak lut mi asi. A mah bantuk mifim cathiam midawh tampi an rak phak tik ah rianhma tampi akal, kan izohthla kan ibochan hna. Tampi zong kan herh hna. Credit: Chak Um Pa (Laichanrel Chakumpa)