The Chin Post: Yangon Kaṭuanṭey, Mingalardone, Taungdagon, Kuanchankung le Tharkeṭa peng ah meithal kahnak a chuak i, ni thum chung ah khuabawi pali an thi. Inn-zaa uk pakhat le inn-hra uk pakhat hliamhma an pu, tiah tualchung mi hna nih an chim.

Ṭuanṭey peng le Taungdagon peng ah aho si hngalh lomi nih August 1 ah Ṭuanṭey peng Bikhu khua i khuabawi a ṭuan liomi Thein Win cu a kah thah. Taungdagon peng, No.25 sang ah inn-zaa uk Kyaw Ngaing zong hliamhma a pu. Mingalardone peng Shwenanthar khua komh khuabawi Win Ngaing Htun le a nupi Hemar Lwin cu kah thah an tong. Kuanchankung peng Aungmingalar khua inn-hra uk Myo Min Khine zong kah thah a tong.

Tharkeṭa peng No.6 sang ah aho si hngalh lomi nih nizan August 3 ah inn-hra uk Ngi Ngi Lwin cu a kah i hliamhma a pu, tiah sang mi hna nih an chim. A luancia July thla ahkhan Yangon khua chung ah bomb puahnak a chuak i, minung pahnih an rak thih pinah pakua hliamhma an pu.

Thawngpang dang: Sagaing ramṭhen, Kalay peng Tharyarkung khua pawng ah SAC ralkap le PDF ṭangrual phu hna kahdohnak a rak chuak. Khuami pakhat nih cun, “SAC ralkap pawl cu Tharyarkung khua sianginn ah umhmun an khuar caah PDF ṭangrual phu hna nih khua chung ah an va luhhnawh hna i, kaphnih kar kahdohnak a chuak. Nizan August 3 zanlei in an i kap i, zan sml 12:00 hrawng tiang an i kap.

PDF lei in ralkap pakhat a nunnak a liam,” tiah The Chin Post ah a chim. Kahdohnak ruangah Tharyarkung khuami cu hmun thum ah an zam dih hna nain nihin August 4 ah Cia Ing le Kyarinn ah a zammi cu khuami motor ngeimi hna nih Tahan ah an rak thlah cang hna, tiah a chimchap.

Kuan le zen kan chambau ngai caah a rannak in kan herh ko, tiah VAKOK-CNDF nih nawlnak an tuah. Kahdohnak a zual ngai caah aho hmanh Kalay peng thlanglei ah kal rih lo ding a si lai, tiah August 2 ah VAKOK-CNDF nih mizapi ralrin an rak pek hna.