Kan farnu Nilen Parmawi a celh hrim lo. A dawtmi zuun tlem in a um peng rih. Atu hi a dawtmi “John Mang Cung” nih mual a liamnak hi a kum 2 nak a si cang. Nihinni tiang a philh rih lo, ti a fiang ngaingai. Tutan zongah Nilen Parmawi nih a darling a philh lonak kong le a ngaihnak kong a taarmi kan rak taar chin.

“Atu lio cu zaan tlaipi ah ka mang ah ka hmuh lengmang ee. Ka zaan mang ah a dam rih ee. Ka zaan mang hi a tak ah si ter ka duh. Asinain, ka tuah (tlai) kho lo. I ṭhangh zong ka duh rih lo. Nilen nih ka ngaih bantukin amah zong nih a ka ngai ve lai tiah ka ruah. A liam taak hnu cun mitthli he zing ka thawh caan a tlawm ti lo ee. Asianin zaan mang ah chung tonnak (ka hmuhmi hi) caan kaa ngeihmi hi lawm tuk ee. Ka ngaihnak hi a vui in vui thongkhat zong ka duh,” tiah Nilen Parmawi nih a ṭial

Naite ah hi bantuk ṭhiamṭhiam in Nilen Parmawi nih Hniang 8|22|2020 ah amah pumpak Facebook timeline ah a darling he an hmanthlak taar in hitihin a rak taar,“Atu cun kum 2 liam cang, kan i duh ka tein atu tiang nikhat hmanh kan philh caan a um lo. Hi vawlei cungah hin rak um rih seh law cu, atu cun kan i duh nak kum 4 zong a luan ve cang hnga,” tiah a taar.

 

A luancia kum 2018 Myanmar Idol Season 3 hlasak zuamnak ah Top 5 a phanmi kan naunu Nilen Parmawi cu Myanmar Idol aizuam cuahmah lioah a darling John Mang Cung Ling(tleicia) nih ruah lo piin mual a rak liam taak. Myanmar Idol Season 3 aizuam cuahmah lio zong a si i a rak celh ve hrimhrim lo.

A dawtmi John Mang Cung Ling(tleicia) philh lonak hla ‘Going Crazy’ timi hla tiang a rak sak. Hi hla a darling caah a sakmi hla cu Chiapa 16, 2019 a rak chuak i Social media a rak linsa ngaingai. Cun, amah Nilen Parmawi hrimhrim nih a darling a philh lonak kong interviews an tuahnak le amah pumpak facebook ah azuuntlemnak bia tete a rak chim pah lengmang.

Nilen Parmawi cu a darling John Mang Cung Ling nih Pur 22, 2018 ah ruah lo piin mual a rak liam taak. A darling nih a liamnak in atu hi a kum hnihnak a si cang. A philh kho hrimhrim loh. A darling caah hla a sakmi le a hawile nih amah philh lonak caah tiin hla an sakmi zong a tanglei ah kan rak taar chih.

VIDEO-A hawile nih amah philh lonak ca’h an sakmi.

VIDEO-Nilen nih amah philh lonak ca’h a sakmi

Chirhchan: Nilen Parmawi